Gürcüstan, Tbilisi, 20 fevral /Trend, müxbir N.Kirsxaliya/
Gürcüstan Xəzərin Azərbaycan sektorunda "Şahdəniz" qaz-kondensat yatağının işlənməsinin ikinci mərhələsi çərçivəsində hər il tranzitə görə təqribən 1 milyard kubmetr qaz əldə edəcək.
Trend-in məlumatına görə, bunu Gürcüstanın energetika naziri Kaxa Kaladze energetika məsələləri üzrə Avropa komissarı Günter Ottingerlə görüşünün yekunları üzrə deyib.
K.Kaladze bildirib: "Şahdəniz-2" layihəsinin reallaşdırılması ilə boru kəmərinin (Cənubi Qafqaz Boru Kəməri) buraxılış qabiliyyətini əlavə olaraq 16 milyard kubmetr qaz həcmində yüksəltmək imkanımız olacaq. Bu bizim üçün önəmlidir, çünki tranzit qazının 5 faizi Gürcüstanda qalacaq ki, bu da təqribən 1 milyard kubmetr təşkil edir".
Nazir görüşün yekunları üzrə qeyd edib ki, Gürcüstanın Avropa İttifaqının "Enerji birliyi" layihəsinə daxil olması üzrə danışıqlara başlanılıb: "Ötən il biz birliyə üzv olmaq üçün ərizəmizi təqdim etmişdik. Bu istiqamətdə işlərə başlanılıb".
Qeyd edək ki, "Şahdəniz"də iştirak payları belədir: BP (operator - 28,8%), ARDNŞ (16,7%), Statoyl (15,5%), LUKOYL (10%), NİKO (10%), Total (10%) və TPAO (9%).
Yatağın ehtiyatları 1,2 trilyon kubmetr qaz həcmində qiymətləndirilir.