"Şahdəniz" qazkondensat yatağının işlənmə operatoru BP Azerbaijan layihə çərçivəsində sualtı boru kəmərlərini, həmçinin Səngəçal terminalında avadanlığı sınaqdan keçirməyi planlaşdırır. Bu barədə Trend ə şirkətdən bildiriblər. İşlər başa çatdıqdan sonra Gürcüstan ərazisində SCP boru kəmərinin təzyiq altında sınaqdan keçirilməsi davam etdiriləcək.
Hazırda qaz hasilatı üçün nəzərdə tutulmuş TPG 500 platformasında işə salma işləri davam etdirilir. Bütün işlər qrafikə əsasən gedir və sentyabrın ortalarında başa çatacaq.
TPG 500 platforması qazma, hasilat və 120 nəfərlik yaşayış blokundan ibarət özüqalxan qurğudur. Onun ümumi kütləsi 32 min tondur (üst tikililəri 22 min ton, istinad və əsasları 10 min ton).
2006-cı ilin iyun ayından etibarən terminalın genişlənmə proqramının ərazisində yeni müvəqqəti kompressor stansiyası fəaliyyət göstərir. Stansiya "Azəri"-"Çıraq"-"Günəşli" yatağından hasil edilən qazla SCP sisteminin sınaq proseslərinə yardım etmək üçün istifadə olunur.
Boru çəkmə işlərinin tamamlanması ilə dəniz boru kəmərləri təmizləmə və sınaq proseslərindən keçiblər. Avqust ayı ərzində "AÇG" yatağından səmt qazının köməyi ilə boru kəmərindən su boşaldılacaq və bu sentyabr ayında "Şahdəniz" yatağından ilk qazı qəbul etməyə imkan yaradacaq.
