"Azəri"-"Çıraq"-"Günəşli" (AÇG) yatağından hazırda Azərbaycana sutkada təxminən 8,2 mln. kub metr qaz verilir. Razılaşmaya əsasən bu həcm qış dövrü ərzində veriləcək. Bu barədə Trend ə bazar ertəsi BP-Azerbaijan şirkətindən ("AÇG" layihəsinin operatoru) məlumat verilib.
Əvvəl ehtimal olunurdu ki, 2007-ci il ərzində "AÇG"dən Azərbaycana verilən səmt qazının həcmi 1,4 mlrd. kub metr - sutkada 4 mln. kub metr təşkil edəcək. Şirkətdən bildirilib ki, bu qaz hər hansı kompensasiya olmadan ötürüləcək.
Azərbaycan Dövlət Neft Şirkəti nümayəndələrinin qeyd etdiyi kimi, bu il Azərbaycan AÇG yatağının tam miqyaslı işlənməsi çərçivəsində Azərbaycan Beynəlxalq Əməliyyat Şirkətindən (ABƏŞ) 3 mlrd. kub metr səmt qazı alacaq.
İndi ötürülən həcmlərdən 7 mln. kub metr Səngəçal neft terminalından, 1,2 mln. isə "Neft Daşları"ndan verilir.
"Mərkəzi Azəri", "Qərbi Azəri" və "Şərqi Azəri" platformalarında hasil olunan səmt qazının bir hissəsi 28 düymlü sualtı qaz kəməri vasitəsilə Səngəçal terminalına, oradan isə "Azəriqaz" QSC-yə nəql olunur. "Çıraq" platformasından hasil olunan qazın bir hissəsi 16 düymlü qaz kəməri vasitəsilə ARDNŞ-in "Neft Daşları"ndakı kompressor stansiyasına göndərilir.
Kompressor və subasan platformanın istismara verilməsi ilə "Çıraq" platformasında adi rejimdə qazın məşəldə yandırılması dayandırılıb.
