Bakı. Trend:
Özbəkistan "yaşıl" keçid hədəflərinə çatmaq üçün beynəlxalq tərəfdaşlarla əməkdaşlığı davam etdirəcək.
Trend xəbər verir ki, bunu Özbəkistan Respublikasının investisiya, sənaye və ticarət naziri Laziz Kudratov İqlim Dəyişmələri üzrə COP29-un Liderlər Sammiti çərçivəsində "Əməkdaşlığın Gücü: Net-Zero üçün fəaliyyətlərin birləşdirilməsi" mövzusunda keçirilən panel müzakirədə çıxışı zamanı deyib.
"Özbəkistanda "yaşıl" keçidi təşviq etmək üçün fəal tədbirlər həyata keçirilir və ilk növbədə yaşıl enerji sertifikatının tətbiqində əldə olunan uğurlar diqqətə layiqdir. Bu sistem, bərpa olunan enerji mənbələrindən və ekoloji təmiz texnologiyalardan istifadə edən istehsalçıları dəstəkləyir. Hər bir sertifikat 5000 kVt·saat enerji istehlakını azaldır və dayanıqlı istehsalı stimullaşdırır. Biz təxminən 20,000 sertifikat təqdim etmişik, bu da bu sahədə maraq və inkişafın artdığını göstərir. Bu mexanizm bütün iştirakçılara – istehlakçılara və istehsalçılara məhsullarının ekoloji dayanıqlılığını artırmağa imkan verir. Bundan əlavə, müəssisələrə investisiya və genişlənmə planları üçün maliyyə cəlb etməyə kömək edir", - deyə o bildirib.
Onun sözlərinə görə, Özbəkistan beynəlxalq maliyyə institutları ilə yaxından əməkdaşlıq edir və iqtisadiyyatın şaxələndirilməsi üçün uzunmüddətli planlar hazırlayır.
"Bu strategiya, karbon neytrallığına nail olmaq məqsədi daşıyır və konkret layihələr və tədbirləri əhatə edir. Hazırda enerji sektoruna investisiya cəlb etmək məqsədilə təşəbbüslər həyata keçirilir ki, bu da Özbəkistana aşağı karbonlu və enerji səmərəli iqtisadi modellərə keçməyə imkan verəcək. Bundan əlavə, biz iqtisadi artım və iqlim şəraiti barədə hesabatın hazırlanmasına dair layihələr həyata keçiririk, bu hesabat Dünya Bankı tərəfindən dəstəklənir. O, iqlim dəyişikliklərinin iqtisadiyyata təsirinin ətraflı təhlilini təqdim edir, bu da effektiv tədbirlər hazırlamağa və beynəlxalq maliyyə və enerji bərpası proqramlarına giriş əldə etməyə imkan verir", - əlavə edib.
Laziz Kudratov bildirib ki, əsas istiqamət 2030-cu ilədək Özbəkistanın Yaşıl İnkişaf Strategiyasının həyata keçirilməsidir. Proqramda konkret məqsədlər yer alır: 2010-cu illə müqayisədə istixana qazlarının xüsusi emissiyalarının 0,5 faiz azaldılması, ümumi elektrik enerjisi istehsalında bərpa olunan enerjinin payının 4 faizə çatdırılması və 2030-cu ilə qədər ÜDM vahidi üzrə enerji istehlakının 30 faiz azaldılması.
"Bütün bu təşəbbüslər – sertifikatlaşdırma sistemindən tutmuş elektrik enerjisinin istehsalına nəzarət və iqlim təsirinin qiymətləndirilməsinə qədər – müasir enerji qənaətcil texnologiyalara yönəlmiş, daha səmərəli resurslardan istifadə edən dayanıqlı bir iqtisadiyyatın yaradılmasına xidmət edir. Biz həmçinin beynəlxalq tərəfdaşlarla əməkdaşlığı davam etdirəcəyik", - nazir vurğulayıb.
Xatırladaq ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Dünən isə Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimi keçirilib.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.