Azərbaycan, Bakı, 21 fevral / Trend , müxbir S.Babayeva/ Azərbaycan provayderləri daha aşağı qiymətlərlə internet xidməti göstərmək üçün texniki resurslar ala biləcəklər. Bu barədə cümə axşamı rabitə və informasiya texnologiyaları naziri Əli Abbasov məlumat verib.
"Biz beynəlxalq internet-kanalın qiymətlərinə təsir gösrətə bilmərik, lakin daxili resurs qiymətlərinin endirilməsi üçün imkan var" - deyə nazir vurğulayıb.
Onun sözlərinə görə, qısa müddət ərzində internet resurslarının aşağı salınması məqsədi ilə tariflərə baxılması üçün "Aztelekom" İB və "Baktelekom"a göstəriş verilib.
"Bu təkcə ATS-ə deyil, həmçinin digər yerli resurs kanallarına da aiddir. Bu qiymətlərin iki il öncə endirilməsinə baxmayaraq, onlar hələ də yüksək hesab olunur" - deyə Abbasov söyləyib.
Nazir bildirib ki, bu resurslar provayderlərə ölkənin regionlarında internet xidməti göstəriləcəyi halda pulsuz veriləcək.
Azərbaycanda 30 internet-provayderi fəaliyyət göstərir və onlardan yalnız ikisi dövlət şirkətidir.
Rabitə və İnformasiya Texnologiyaları Nazirliyinin məlumatına görə, Azərbaycanda internet istifadəçilərinin sayı 1 mln. nəfər təşkil edir.