Azərbaycan, Bakı, 17 mart / Trend , müxbir/ Cari ilin yanvar-fevral aylarında Azərbaycanda əhali və təşkilatlara 127,4 mln. manat həcmində rabitə xidməti göstərilib. Bu göstərici ötən ilin analoji dövr göstəricisindən 42,2 faiz çoxdur. Bu barədə Azərbaycan Dövlət Statistika Komitəsindən məlumat verilib. Əldə olunan gəlirlərin demək olar ki, 75 faizi Mobil rabitənin payına düşüb. Bu sahədə artım ötən ilin yanvar-fvralına nisbətdə 60,1 faiz təşkil edib.
Azərbaycanın regionlarında da rabitə üzrə xidmət həcmi artıb. Quba-Xaçmaz iqtisadi rayonunda xidmət artımı 28,9 faiz təşkil edib, Şirvanda - 48,5 faiz, Şəki-Zaqatala - 33,3 faiz, Aranda - 22,9 faiz, Naxçıvanda - 49 faiz, Lənkəranda - 47,4 faiz, Apşeron - 30,4 faiz və Gəncə-Qazaxda isə 29,2 faiz təşkil edib.
Cari ilin yanvar ayında rabitə sahəsi üzrə işçilərin sayı 22,3 min nəfər təşkil edib. Bu sahə üzrə orta aylıq əmək haqqı 327,4 manat təşkil edib ki, bu da ötən ilin eyni dövrü ilə müqayisədə 37,3 faiz çoxdur. Dövlət müəssisəsi üzrə əmək haqqı artımı 28,9 faiz, özəl sektor üzrə isə 29, 9 faiz təşkil edib.
