Azərbaycan, Bakı, 11 aprel /Trend, müxbir H.Vəliyev/
Almaniyanın "Rittal" şirkəti öz telekommunikasiya məhsullarının Azərbaycan bazarında irəliləyişində maraqlıdır. Bu barədə bazar ertəsi Trend-ə "Rittal" şirkətinin regional meneceri Aleksandr Morozov bildirib.
Onun sözlərinə görə, bu il üçün şirkətin perspektiv planlarına məlumatların işlənməsi mərkəzlərinin enerji-effektiv sistemlərinin tələb olunduğu Azərbaycandakı müxtəlif bazar seqmentlərini əhatə etmək daxildir. Bunlar bank, sənaye sektorları, Azərbaycanın dövlət müəssisələridir.
"Azərbaycan bazarında tərəfimizdən reallaşdırılan layihələrdən biri "Ericsson" şirkətinin Azərbaycandakı nümayəndəliyi ilə əməkdaşlıqdır. Məhsullarımızın bu şirkətə satışı Türkiyə vasitəsilə həyata keçirilir", - Morozov deyib.
Regional menecerin sözlərinə görə, perspektivdə şirkət internet-xidmət provayderləri, rabitə xidmətləri və bütün respublika ərazisində internetə çıxışı həyata keçirən dövlət və özəl təşkilatlarla işbirliyinə başlamaqla, Azərbaycanın telekommunikasiya sektoru ilə sıx əməkdaşlıq etmək fikrindədir.
"Rittal" şirkəti telekommunikasiya və paylayıcı şkaflar, kreytlər, cərəyan paylayıcı avadanlıq və s. istehsalçılarından biridir.
