Azərbaycan, Bakı, 9 oktyabr /Trend, müxbir H.Vəliyev /
Azərbaycanda mobil telefonların IMEI-kodlarının qeydiyyatı sistemi dekabrda işə salınacaq. Trend-in məlumatına görə, bu barədə çərşənbə axşamı jurnalistlərə Azərbaycanın rabitə və informasiya texnologiyaları nazirinin müavini İltimas Məmmədov bildirib.
Onun sözlərinə görə, kodların qeydiyyatı sisteminin tətbiqi ölkəyə mobil telefonların qeyri-leqal idxalının qarşısının alınmasında mühüm komponentdir. Belə ki, qeyri-leqal idxal həm mobil rabitə operatorları, həm istifadəçilər üçün standartların qeyri-müvafiqliyi üzündən problemlər yaradır.
Məmmədov bildirib ki, hazırda Nazirlər Kabinetinin qərarına görə, artıq qeydiyyat mərkəzi yaradılıb və operatorlar tərəfindən zəruri addımlar atılıb.
IMEI-kodların qeydiyyatı sisteminin yaradılması üzrə işlər üç ilə yaxındır aparılır. Layihə ilin əvvəlində NK tərəfindən təsdiqlənib. Layihəyə GSM operatorlar və respublikanın dövlət idarələri cəlb edilib.
IMEI-kodların yoxlanması üçün ümumiləşdirilmiş məlumat bazasına çıxış ya istənilən mobil operatorun qısa nömrəsinə SMS məlumat göndərmək yolu ilə, ya da məlumata çıxış olan internet-resurs vasitəsilə həyata keçiriləcək.
Məlumat bazasının formalaşdırılmasından sonra ümumiləşdirilmiş bazada IMEI-kodun mövcudluğunun yoxlanılması mobil telefonun satın alınması zamanı məcburi prosedur olacaq.