Azərbaycan, Bakı, 8 aprel /Trend, müxbir H.Vəliyev/
Mobil nömrələrin daşınması (MNP) xidmətindən istifadə etməklə "Azerfon" şirkətinin şəbəkəsinə keçən digər mobil operatorların abonentlərinin sayı "Nar Mobile" nömrəsi alan yeni abonentlərin sayını ötmür. Trend-in məlumatına görə, bu barədə jurnalistlərə şirkətin baş direktoru Kent Maknili bildirib.
Onun sözlərinə görə, bu, təkcə "Azerfon" şirkətinə deyil, ölkənin digər mobil rabitə operatorlarına da xasdır.
Baş direktor qeyd edib ki, korporativ seqment mobil nömrələrin daşınması xidmətinin məqsədli auditoriyasıdır: "Bu xidmətin işə salınmasının əvvəlindən başqa operatorların şəbəkələrinə keçmiş Nar Mobile-ın şəxsi abonentlərinin sayı yalnız bir neçə yüz nəfər təşkil edir. Korporativ istifadəçilərə gəlincə, bu gün operatorların arasında rəqabət məhz bu seqmentdə gedir və mobil rabitə operatorlarından hər biri abonentlərin bu kateqoriyasını saxlamağa çalışır. Bizim korporativ istifadəçilərlə bağlı tarif siyasətimiz kifayət qədər çevikdir və onların tələbatından asılı olaraq formalaşır. Yaxın vaxtlarda "Nar Mobile" şəbəkəsini nə qədər korporativ abonentin seçdiyi barədə konkret rəqəmlər səsləndirəcəyik".
