Azərbaycan, Bakı, 30 may /Trend, müxbir H.Vəliyev/
Bir sıra bankların və bank olmayan kredit təşkilatlarının (BOKT) istehlak kreditlərinin ödənişini Azərbaycanın poçt rabitəsi şəbəkəsində etmək mümkün olacaq. Bu barədə cümə günü Trend-ə "Azərpoçt" MMC-dən bildiriblər.
Hazırda Azərbaycanın poçt operatoru "Access Bank", "Bank Respublika", "Bank of Baku" bankları, "FINCA Azerbaijan" və "TBC Kredit" BOKT-ları tərəfindən verilən kreditlərin ödənişi xidmətinin tətbiqi üzrə danışıqlar aparır.
Göstərilən bankların Azərbaycanın poçt operatorunun şəbəkəsinə yaxın vaxtlarda qoşulacağı gözlənilir. Hazırda poçt şəbəkəsində "ExpressBank", "Unibank" və "Yapı Kredi Bank Azerbaijan"ın istehlak kreditlərinin ödənişi xidməti mümkündür. Kreditlərin köçürülməsi üzrə hesablaşmalar poçt operatoru xidmətində həyata keçirilir.
Poçt şöbələri vasitəsilə kreditlərin ödənilməsi təcrübəsi bank təşkilatlarına regionlarda kredit proqramlarını genişləndirməyə, regionlarda borc alanların sayını artırmağa icazə verir. Poçt operatorunun bank xidmətləri avtomatlaşdırılmış korporativ-informasiya sistemi vasitəsilə göstərilir ki, artıq həmin sistemə təxminən 900 poçt rabitəsi şöbəsi və filialı qoşulub.