Azərbaycan, Bakı, 14 avqust /Trend, müxbir Hüseyn Vəliyev/
"Azərpoçt" MMC tərəfindən STEFI (Secured Transfer of Electronic Financial Information) sistemi üzrə pul köçürmələri tariflərinin azaldılması ilin sonuna gözlənilir. Bunu cümə axşamı Trend-ə Rabitə və Yüksək Texnologiyalar Nazirliyindən deyiblər.
Nazirlikdən qeyd ediblər ki, STEFI pul köçürmələri xidmətləri üzrə tarif siyasəti məsələsinə Regional Rabitə Birliyinin (RRB) Poçt rabitəsi üzrə komissiyasının və RRB-nin Poçt Rabitəsi Operatorları Şurasının birgə iclası çərçivəsində toxunulacaq.
Nazirlikdən bildiriblər: "STEFI pul köçürmələri üzrə tariflərin azaldılması haqqında qəbul edilən qərar "Azərpoçt"a öz filial şəbəkəsində bu növ xidmətlərlə bağlı qiymətlərin azaldılması üçün zəruri addımlar atmağa imkan verəcək".
Hazırda STEFI üzrə pul köçürmələri xidmətinə görə komissiyanın 6-7 faizə çatdığı ölkələr var. Azərbaycan komissiyanı 2-3 faizədək azaltmağı təklif edir. Azərbaycanda bu sistem üzrə pul köçürmələrinə görə komissiya haqqı digər ölkələrlə müqayisədə ən aşağıdır. Buna baxmayaraq, Azərbaycan poçtu alınan komissiyanı 1,5-dən 1 faizədək azaltmağa hazırdır.
Hazırda Azərbaycanın poçt operatoru STEFI sistemi üzrə Ukrayna, Belarus, Moldova, Rusiya, Qazaxıstan və BƏƏ-yə təcili pul köçürmələrini təklif edir. Xidmət yaxın vaxtlarda Qırğızıstan üzrə də tətbiq ediləcək.
Azərbaycan poçtu üçün əsas üstünlük STEFI üzrə tranzaksiyalar çərçivəsində əldə edilən gəlirlərin MMC-nin sərəncamında qalmasıdır.
