Rabitə və İnformasiya Texnologiyaları Nazirliyi 2006-cı ilin sonunadək Samux telefon şəbəkəsinin elektronlaşdırılmasını tamamlamağı və bu şəbəkəni fiberoptik kabelə qoşmağı planlaşdırır. Trend in nazirliyə istinadən verdiyi xəbərə görə, bu məqsədlə Telekommunikasiya qovşağında (TKQ) artıq müvafiq tender keçirilib.
Şəbəkənin elektronlaşdırılmasından sonra kənd rabitəsində yeni imkanlar yaradılacaq, belə ki, bütün ATS binaları əsaslı surətdə təmir olunacaq, əlavə olaraq Lək və Burunqovaq kəndlərində elektron ATS-lər quraşdırılacaq və bu da ən ucqar yerlərə keyfiyyətli rabitə xidmətləri, o cümlədən İnternet əldə etmək imkanı verəcək. İlin sonunadək Samux TKQ-nın həcminin 7440 nömrəyə qədər artırılması planlaşdırılır, bu isə 36 yaşayış məntəqəsinin telefonlaşdırılması deməkdir.
Hazırda Samuxun 3 qəsəbə və 11 kəndində 14 ATS fəaliyyət göstərir. Onlardan 6-ı elektron, 8- i isə analoq tiplidir. Elektron ATS-lərin montaj həcmi 2768, analoji ATS-lərin montaj həcmi isə 5418 nömrə təşkil edir.