2006-cı ilin yanvar-oktyabr aylarında Naxçıvan Muxtar Respublikasında (NMR) rabitə sahəsində müəssisə, təşkilat və əhaliyə 8694,5 min manat məbləğində xidmət göstərilib və bu, 2005-ci ilin analoji dövrü ilə müqayisədə 13,9% çoxdur. Bu barədə Trend ə NMR-in Bakıdakı daimi nümayəndəliyindən məlumat verilib.
Bu dövr ərzində Muxtar Respublikanın Rabitə və İnformasiya Texnologiyaları Nazirliyi tərəfindən 2073,9 min manat məbləğində xidmət göstərilib, bu isə 2005-ci ilin həmin dövründən 14,6% çoxdur.
İlin əvvəlindən nazirlikdən 2894 telefon xətti çəkilib və onların artımı 13,7% təşkil edib.
Göstərilən dövrdə NMR-in rabitə müəssisələrində işçilərin sayı 814 nəfər təşkil edib, bu isə 2005-ci ilin göstəricisindən 4,5% çoxdur. Rabitə işçilərinin orta aylıq əmək haqqı 5,8% artaraq, 111,4 manat təşkil edib.
10 ay ərzində NMR rabitəsi Trans-Asiya-Avropa (TAA) fibrooptik magistralına qoşulub. İki şəbəkə istismara verilib - Naxçıvan və Bakı arasında STMİ səviyyəli tranzit şəbəkəsi və muxtar respublikanın ərazisindəki magistral üzrə SDH şəbəkəsi. Birinci şəbəkə müxtəlif data-kanalların, videokonfransların, videotelefonların və s. yaradılması üçün kifayət qədər ehtiyata malikdir. İkinci şəbəkə radiolinklər vasitəsilə işə salınan Babək, Culfa, Nehrəm, Abraqunus, Gülüstan-ın mərkəzi ATS-lərini əhatə edir, CDMA texnologiyasının xidmətləri, Bakcell şirkətinin mobil rabitəsi tətbiq edilib.
