Azərbaycan, Bakı /müx. Trend S.Babayeva/ Maltanın FIMbank-ı (First International Merchant Bank) Parisin Apellyasiya məhkəməsinin yuxarı instansiya məhkəməsinin Azərbaycanın xeyrinə çıxardığı qərarın icrasına dair qərarını yerinə yetirməyə hazırdır. Azərbaycanın Rabitə və İnformasiya Texnologiyaları Nazirliyindən cümə axşamı günü verilən məlumata görə, yaxın günlərdə məsələ ilə bağlı rəsmi məhkəmə bildirişinin təqdim ediləcəyi gözlənilir.
Məlumat üçün bildirək ki, yuxarı instansiya məhkəməsinin müvafiq qərarı 2006-cı ilin noyabrında qəbul edilib. Bu qərara əsasən, FİMbank mənəvi ziyana görə Azərbaycan tərəfinə 5 min avro və məhkəmə-prosedur xərclərinin ödənilməsi üçün 900 avro ödəməlidir. Yuxarı instansiya məhkəməsinin qərarı bir müddət icra olunmamış vəziyyətdə qalıb. Buna səbəb FİMbank-ın Parisin Apellyasiya məhkəməsinə etdiyi şikayət olub.
Azərbaycan tərəfi etiraz edib ki, yuxarı instansiya məhkəməsinin qərarı icra olunmadan Parisin Apellyasiya məhkəməsi FIMbank-ın şikayətinə baxa bilməz. Nəticədə bu, Azərbaycan tərəfi üçün müsbət nəticə verib. FİMbank məhkəmənin müvafiq qərarını icra etməyə hazır olduğunu bildirib.
Məsələ ilə bağlı dinləmələr mayın 3-də keçiriləcək. Əgər Parisin Apellyasiya məhkəməsi maltalıların xeyrinə qərar çıxarsa, Azərbaycan Ali məhkəməyə şikayət edəcək.
Xatırladaq ki, FIMbank-la Azərbaycan arasındakı məhkəmə çəkişməsi 2004-cü ilin iyulundan başlayıb. Bank kreditin qaytarılmaması faktı ilə bağlı Rotterdam və Paris məhkəməsinə müraciət edib. Maltalıların iddiasına görə, bu kredit Rabitə Nazirliyinin "Pochtbank"ının zəmanəti ilə nazirliyin mövcud olmayan müəssisələrinə (Aztell-ə 3,035 mln. və Baktell-ə 1,56 mln. dollar) verilib.
