Bakı. Trend:
Qırğızıstanın Bişkek-Oş strateji avtomobil yolunda qar uçqunu nəticəsində altı minik avtomobili və bir mikroavtobus qar altında qalıb.
Trend xəbər verir ki, bu barədə Respublika Fövqəladə Hallar Nazirliyinin Mətbuat Xidmətindən məlumat verilib.
Çuy vilayətinin Jayıl rayonunda, yolun 132-ci kilometrində baş verən uçqun 3500 kubmetr həcmində qar kütləsi ilə nəqliyyat vasitələrini basdırıb. Nəqliyyat vasitələrindən biri tamamilə qar altında qalıb.
Xilasedicilər həmin avtomobildən dörd nəfəri xilas ediblər. Xilas edilənlər arasında huşunu itirmiş bir qadın da var. O, təcili tibbi yardım maşını ilə xəstəxanaya aparılıb. Digər avtomobillərdə olan şəxslər öz gücləri ilə maşınlardan çıxıblar.
Hadisə yerində yolun qar uçqunundan təmizlənməsi işləri davam edir. "Aral" və "Sosnovka" keçid məntəqələrində nəqliyyatın hərəkətinə müvəqqəti məhdudiyyətlər tətbiq edilib.
Müvafiq xidmətlər əhaliyə ehtiyatlı olmağı tövsiyə edir və Bişkek-Oş avtomobil yolu ilə səyahət etməyi planlaşdıranlara şərait düzələnə qədər yola çıxmamağı məsləhət görür.