Trend in xəbər verdiyi kimi, ABŞ dövlət katibi Kondoliza Rays gözlənilməz səfərlə İraqa gəlib. Beləliklə, dövlət katibi ondan bir neçə saat əvvəl Bağdada gəlmiş ABŞ-ın müdafiə naziri Donald Ramsfeldə qoşulub. Qeyd edək ki, D.Ramsfeld də öz səfəri barədə bildirməyib. Bu, müdafiə nazirinin hərbi kampaniya başlanandan bəri 12-ci, 2006-cı ildə isə 1-ci səfəridir.
D.Ramsfeld kimi K.Raysın da ölkənin yeni baş naziri Cavad əl Maliki, o cümlədən İraqın digər aparıcı siyasətçiləri ilə görüşlər keçirəcəyi gözlənilir. Məqsəd ABŞ prezidenti Corc Buş administrasiyasının yeni İraq hökumətini dəstəklədiyini bildirməkdən ibarətdir. Bu barədə Associated Press xəbər verir.
Bundan başqa, Pentaqon rəhbəri K.Raysın gəlişini gözləməyərək artıq Amrerikanın İraqdakı kontingentinin baş komandanı general Corc Keysi ilə görüşüb. C.Keysi ABŞ-ın İraqdakı kontingentinin ixtisara salınmasının nə zaman mümkün olacağı ilə bağlı suala birbaşa cavab verməkdən imtina edib. Bu barədə RBK xəbər verir.