Azərbaycan, Bakı, 1 mart /Trend, müxbir İ.İzzət/
Binəqədidə avtomaşınlardan oğurluq etməkdə şübhəli bilinən üç Bakı sakini yaxalanıb.
Bakı şəhər Baş Polis İdarəsindən Trend-ə bildiriblər ki, Binəqədi Rayon Polis İdarəsi CAŞ və 5-ci Polis Bölməsi əməkdaşlarının keçirdikləri əməliyyat tədbirləri nəticəsində fevralın 28-də oğurluqda şübhəli bilinən Bakı şəhər sakinləri - Balaqardaş Qədimov, Əli Əliyev və Fərhad Məmmədov saxlanılıb.
Araşdırmalar zamanı məlum olub ki, onlar fevralın 20-nə keçən gecə Ə.Naxçıvani küçəsində İsa Rüstəmova məxsus "VAZ-21043" markalı avtomaşından açarseçmə yolu ilə maqnitafon, fevralın 25-nə keçən gecə isə C.Hacıbəyli küçəsində Əhməd Muradlıya məxsus "Mercedes" markalı avtomaşından şüşəni sındırma yolu ilə 100 manat oğurlayıblar.
Bundan başqa, yaxalanan F.Məmmədov fevralın 26-na keçən gecə Ə.Naxçıvani küçəsində Bəxtiyar Səmədova məxsus "VAZ-2105" markalı avtomaşından şüşəni sındırma yolu ilə iki ədəd səsgücləndirici götürüb.
Qədimov, Əliyev və Məmmədovun bundan əvvəl törədilən digər cinayətlərdə əli olub-olmadığına dair araşdırmalar davam etdirilir.