Avstriya,Vyana, 14 mart/ Trend , müxbir A.Ələsgərov/ ATƏT-in Minsk qrupunun Dağlıq Qarabağ münaqişəsi üzrə həmsədrləri BMT-yə təqdim olunmuş "Azərbaycanın işğalı olunmuş ərazilərindəki vəziyyət haqqında" Qətnamə layihəsini dəstəkləmirlər.
"Təqdim olunmuş layihə bizim dəstəyimizi almayacaq. Minsk qrupunun bütün həmsədr-ölkələri bu fikirdədir. Qətnamə həmsədr və münaqişə tərəflərinin işini tam əks etdirmir" - deyə cümə günü Trend a Minsk qrupunun rusiyalı həmsədri Yuri Merzlyakov bildirib.
BMT Baş Assambleyası bu gün "Azərbaycanın işğal olunmuş ərazilərindəki vəziyyət haqqında" Qətnamə layihəsini müzakirə edəcək. Azərbaycan yeni Qətnamədə BMT-nin Baş katibini qətnamənin həyata keçirilməsi haqqında məruzə etməyə çağırıb. Layihədə Azərbaycan ərazilərindən Ermənistan qüvvələrinin dərhal, danışıqlarsız və qeyri-şərtsiz çıxarılması tələbləri irəli sürülür.
Azərbaycan BMT-yə üzv ölkələri işğal olunmuş ərazilərdən qovulmuş əhalinin hüquqlarını təsdiq etməyə, onların öz evlərinə dönməsinin və münaqişə zamanı ziyan dəymiş ərazilərin əhatəli bərpasının zəruriliyini qeyd etməyə çağırır.
Azərbaycan BMT-ni öz ərazi bütövlüyü çərçivəsində Dağlıq Qarabağ ərazisində effektiv demokratik sistemin yaradılmasını dəstəkləməyə çağırır.
"Azərbaycanın Dağlıq Qarabağ ərazisindəki Ermənistan və Azərbaycan icmalarına normal, təhlükəsiz və bərabər şəraitlər yaradılmalıdır" - deyə Qətnamə layihəsində bildirilir.
Merzlyakov hesab edir ki, Qətnamə həddindən artıq birtərəflidir. "Orada ancaq Azərbaycanın maraqlandıran məsələlər qeyd olunub. Layihə vaxtında olmayıb, birtərəfli və nataraz alınıb . Bu hamımız üçün gözlənilməz oldu" - Merzlyakov deyib.
İki cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası ilə başlayıb. 1992-ci ildən etibarən Azərbaycanın 20% ərazisi, həmçinin Dağlıq Qarabağ və ona bitişik 7 rayon Ermənistan Silahlı Qüvvələrinin işğalı altındadır. 1994-cü ilin mayında tərəflər atəşkəs haqqında razılığa gəlib və o vaxtdan Rusiya, Fransa və ABŞ-ın həmsədrliyi altında Minsk qrupunun himayəsi altında sülh danışıqları aparılır.