Bakı. Trend:
“New Europe” qəzetində Azərbaycanın Füzuli rayonun Alxanlı kəndində erməni silahlı birləşmələri tərəfindən dinc azərbaycanlıların qətlə yetirilməsinə həsr olunmuş məqalə dərc olunub.
Ombudsman Aparatından Trend-ə verilən məlumata görə, məqalə Azərbaycanın İnsan Hüquqları üzrə Müvəkkili (Ombudsman) Elmira Süleymanovanın Ermənistan silahlı qüvvələri tərəfindən iyulun 4-də Azərbaycanın Füzuli rayonun Alxanlı kəndində yaşayan mülki əhalinin qətlə yetirilməsi və mülki obyektlərin atəşə tutulması ilə əlaqədar yaydığı bəyanatı əsasında hazırlanıb.
Məqalədə bildirilir ki, Ermənistan silahlı qüvvələri tərəfindən Alxanlı kəndində məskunlaşan çoxsaylı mülki əhalinin yaşadığı yaşayış məntəqələri və mülki obyektlər hədəflənmiş şəkildə və qəsdən atəşə tutulub, nəticədə kənd sakini Sahibə Quliyeva və onun iki yaşlı nəvəsi Zəhra Quliyeva həlak olub, digər mülki şəxs Səlminaz Quliyeva ağır yaralanıb və mülki obyektlər dağıdılıb.
Məqalədə Ombudsmanın tezliklə ədalətin və sülhün bərqərar olunacağı, insanlığa qarşı törədilən bu cinayətlərin beynəlxalq hüquqi qiymətini alacağı, cinayətkarların cəzasız qalmayacağı, BMT Nizamnaməsinə müvafiq olaraq cəzalandırılacağı ilə bağlı fikirləri yer alır.
Həmçinin, Ermənistanın təcavüzünə son qoyulması, beynəlxalq normalara uyğun olaraq Azərbaycanın zəbt olunmuş torpaqlarının azad olunması, erməni hərbi qüvvələrin bu ərazilərdən çıxarılması, Azərbaycanın BMT və dünya tərəfindən tanınmış dövlət sərhədlərinin bərpa olunması, yüz minlərlə məcburi köçkünlərin öz doğma yurdlarına qayıtması qeyd olunur.
Müəllif yazır ki, Müvəkkilin bəyanatı BMT-nin Baş Katibinə, BMT-nin Təhlükəsizlik Şurasına, BMT-nin İnsan Hüquqları üzrə Ali Komissarına, YUNİSEF-ə, BMT-nin Qaçqınlar üzrə Ali Komissarına, BMT-nin Baş Katibinin Uşaqlar və Silahlı Münaqişələr üzrə Xüsusi Nümayəndəsinə, BMT-nin Gender Bərabərliyi və Qadınların Səlahiyyətləndirilməsi üzrə İcraçı Direktoruna, YUNESKO-ya, İslam Əməkdaşlıq Təşkilatına, Avropa Komissiyasına, Avropa Şurasına, ATƏT-ə, Beynəlxalq və Avropa Ombudsmanlar İnstitutlarına, Asiya Ombudsmanlar Assosiasiyasına, Avropa Uşaq Hüquqları Ombudsmanları Şəbəkəsinə (ENOC), Beynəlxalq Sülh Bürosuna, müxtəlif ölkələrin ombudsmanlarına, Azərbaycanın xarici ölkələrdəki və xarici ölkələrin ölkəmizdəki səfirliklərinə, eyni zamanda Azərbaycanın çoxsaylı diaspor təşkilatlarına göndərilib.
“New Europe” baş ofisi Brüsseldə yerləşən, Avropa İttifaqı və beynəlxalq siyasətə dair məlumatların dərc edildiyi müstəqil həftəlik qəzetdir.
Qeyd edək ki, iyulun 4-də axşam saatlarında erməni silahlı birləşmələri Füzuli rayonunun Alxanlı kəndini minaatanlardan atəşə tutub. Təxribat nəticəsində Alxanlı kənd sakinləri - 1966-cı il təvəllüdlü Quliyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, 1965-ci il təvəllüdlü Quliyeva Sərvinaz İltifat qızı isə ağır yaralanıb.