Azərbaycan, Bakı, 07 mart / Trend ", müxbir Q.Cəbiyev/ Azərbaycanın müxalif Müsavat Partiyası hesab edir ki, müxalifətin prezident seçkisində vahid namizədlə iştirak etməsi mümkün deyil. "Müxalifətin vahid namizədlə seçkilərə qatılması məsələsi süni şəkildə ortalığa atılıb" cümə günü jurnalistlərə Müsavat Partiyası Məclisinin sədri Sülhəddin Əkbər bildirib.
Azərbaycanda prezident seçkisi oktyabrda keçiriləcək. Bəzi müxalifət partiyası müxalifətin seçkiyə vahid namizədlə getməsini təklif edib.
Əkbər deyib ki, müxalifətin vahid namizədinin reallaşması absurddur və bu, hakimiyyətin taktikasıdır. "Müxalifət qüvvələri demokratik maraqlar uğrunda birləşə bilmirsə, vahid namizədin ortalığa atılması müxalifət arasında kövrək olan əlaqələri tamamilə dağıdacaq, çünki vahid namizəd məsələsi müzakirəyə çıxarılan kimi hər bir müxalifət partiyası öz namizədinin şanslı olduğunu iddia edəcək" Əkbər əlavə edib. Onun sözlərinə görə, vahid namizədin müəyyənləşməsi səhv taktikadır və Müsavat Partiyası bu təxribata getməyəcək.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub.
