Rusiya, Moskva, 30 aprel/ Trend müxbir R.Ağayev/ İranın Buşehr" atom elektrik stansiyasının tikintisi üçün nəzərdə tutulan Rusiya yükünün saxlanılması ilə bağlı məsələ hazırda bu layihənin reallaşdırılmasında maraqlı olan bütün qüvvələr tərəfindən həll edilir. Bu barədə Trend -a çərşənbə günü, "AtomStroyEksport" QSC-nin mətbuat xidmətinin rəhbəri İrina Yesipova məlumat verib.
Buşehr AES üçün avadanlıqdan ibarət yük martın sonunda Azərbaycan hökumətinin sərəncamı ilə Azərbaycan-İran sərhədində saxlanılıb. Bu barədə isə aprelin 21-də məlum olub. Bakı hökuməti Rusiya tərəfindən yükün tərkibi haqqında daha konkret məlumat istəyib.
Yesipova bildirib ki, bu məsələdə "AtomStroyEksport"dan asılı olan hər şey tam həll edilib, bütün tərəflərlə müvafiq danışıqlar aparılıb. Onun sözlərinə görə, "AtomStroyEksport" bu məsələ ilə bağlı bütün lazımi məlumatı təqdim edib. "Bu problemin həllinə qoşulmuş bütün tərəflər məsələnin tezliklə həll edilməsinə yardım edirlər", - o bildirib.
Azərbaycan xarici işlər nazirinin müavini Araz Əzimov və İranın Azərbaycandakı səfiri Nasir Həmidi Zare çərşənbə günü müzakirələr aparıbar. Azərbaycan XİN-in mətbuat katibi Xəzər İbrahim bu gün bildirib ki, Azərbaycan və İran, martın 29-da Azərbaycan-İran sərhədində - Astaradakı gömrükdə saxlanılan Buşehr AES üçün nəzərdə tutulmuş yükün buraxılması məsələsində Rusiya tərəfinin cavabını gözləməyi qərara alıblar. "Bu siyasi deyil, texniki məsələdir və Rusiya tərəfdən yükün tərkibi haqqında Azərbaycanın sorğusuna cavab alındıqdan sonra həll ediləcək", - mətbuat katibi bildirib.
Əldə olan məlumatlara görə, yükün saxlanılmasının səbəbi Azərbaycan hökumətinin verməli olduğu tranzit üçün xüsusi icazənin olmaması ilə bağlıdır.
Tehranda səfərdə olan Rusiya Təhlükəsizlik Şurası katibinin səlahiyyətlərini icra edən Valentin Sobolev jurnalistlərə bildirib ki, "RF və İranın malik olduğu məlumatlara görə, AES üçün nəzərdə tutulmuş yükün Azərbaycandan daşınması zamanı heç bir pozuntu olmayıb".
İran hesab edir ki, Buşehrdəki AES üçün avadanlıqdan ibarət yükün Azərbaycan-İran sərhədində saxlanılmasının səbəbi gömrük problemləri ilə bağlıdır və məsələnin tezliklə həll ediləcəyinə ümid edir. Bu barədə Trend -a İranın Azərbaycandakı səfiri Nasir Həmidi Zare məlumat verib.
Rusiya RF və İran arasında 1992-ci ildə bağlanan hökumətlərarası saziş çərçivəsində Buşehr AES-in birinci blokunun tikintisini həyata keçirir.
"AtomStroyEksport" 1995-ci ilin yanvarında imzalanmış müqaviləyə əsasən, tikintisinə Almaniyanın Kraftwerk Union A.G. (Siemens/KWU) konserni tərəfindən başlanılmış AES-in tikintisini başa çatdırır. "Atomstroyeksport" burada 1998-ci ildən işləməyə başlayıb.
