Azərbaycan, Bakı, 08 may / Trend , müxbir E.Babayev/ Azərbaycanın Mərkəzi Seçki Komissiyası (MSK) hesab edir ki, Azərbaycanda seçki kampaniyasına ayrılan müddət azaldılmalı və dünya ölkələrində mövcud olan praktikaya uyğunlaşdırılmalıdır. "Dünyanın heç bir ölkəsində Azərbaycanda olduğu qədər uzun seçki kampaniyası yoxdur" cümə axşamı Trend a MSK katibi Natiq Məmmədov deyib.
Parlamentdə çoxluğu təşkil edən Azərbaycanın hakim Yeni Azərbaycan Partiyası (YAP) seçki kampaniyasının 4 aydan 2 aya endirilməsi təklifi ilə çıxış edib. Prezidentin İcra Aparatının rəhbəri Ramiz Mehdiyev deyib ki, ötən həftə Seçki Məcəlləsinə əlavə və dəyişiklikləri nəzərdə tutan layihə Milli Məclisə təqdim olunub. Layihədə seçki kampaniyası müddətinin 2 aya qədər endirilməsi yer almayıb. Ancaq həmin təklif Milli Məclisdə müzakirə oluna bilər və yekun qərar Parlamentdə çıxarılacaq.
Azərbaycan müxalifəti isə hesab edir ki, seçki kampaniyası müddətinin azaldılması müxalifətin təbliğat imkanlarını məhdudlaşdıracaq.
MSK katibi bildirib ki, Milli Məclis seçki kampaniyası müddətini 2 aya endirərsə, bu, seçki komissiyalarının işinə məfi təsir göstərməyəcək.
Azərbaycanda prezident seçkisi oktyabrın 15-də keçiriləcək.
Məqalə müəllifi ilə əlaqə ünvanı: [email protected]
