Azərbaycan, Bakı, 13 may/ Trend , müxbir D.Xatınoğlu/ Pakistanda hakim partiyanın yeni yaranmış koaliasıyasının dağılması hakim Xalq Partiyasının prezident Pərviz Müşərrəflə saziş bağlaması ilə əlaqədardır. "Xalq Partiyası nüfuzunu saxlamaq üçün Müşərrəflə sazişə girmək məcburiyyətində qalıb"- deyə, pakistanlı politoloq Əbdulhəy Ənis hesab edir.
BBC-nin çərşənbə axşamı yaydığı məlumata əsasən, "Müslim Lig" Partiyasının Nəvaz Şərifin rəhbərlik etdiyi qanadı hakim Xalq Partiyası ilə eyni koaliasiyada təmsil olunmaqdan imtina edib. Nəvaz Şərif mətbuata açıqlamasında bildirib ki, Müşərrəfin əmri ilə keçən il vəzifələrindən uzaqlaşdırılmış 30 hakimin işlərinə bərpa edilməməsinə etiraz əlaməti olaraq, Koalisiyadan çıxıb.
"Əvvəldən də Nəvaz Şərif ilə Yusif Rza Gilanidən (Xalq Partiyasından seçilmiş Baş nazir) ibarət koaliasiyanın fəaliyyətinin uzun sürəcəyi gözlənilmirdi"- deyə, Ənis çərşənbə axşamı telefonla İslamabaddan Trend -a bildirib.
Onun fikrincə, xarici qüvvələr Pakistan prezidentinin mövqeyinin zəiflənməsində maraqlı deyil: "ABŞ neçə vaxtdır ki, Xalq Partiyasının sədri Asəf Əli Zərdarini prezident Pərviz Müşərrəflə koaliasiya yaratmağa məcbur edir. Müşərrəfin hakimiyyətdə qalması üçün Xalq Partiyasının dəstəyinə ehtiyacı var. Digər tərəfdən isə, ölkədə sabitliyi qorymaq üçün Xalq Partiyasının hakimiyyətə dəstək verməsi qaçılmazdır" - deyə, Pakistan politoloqu bildirib.
Parlamentdə Nəvaz Şərifin partiyasının böyük nüfuzu var və Şərifin koalisiyadan çıxması Xalq Partiyasının nüfuzunun azalmasına səbəb olacaq - politoloq Ənis belə hesab edir.
Digər Pakistan politoloqu Məhəmməd Mətin isə, çərşənbə axşamı BBC-yə açıqlamasında bildirib ki, Əli Zərdari, işdən azad edilmiş hakimlərin çıxardığı qərara əsasən, korrupsiyada ittham olunaraq, məhkəməyə verilib. "Müşərrəf keçən ay hakimlərin Zərdarinin barəsində çıxardığı qərarı ləğv edib. Zərdari qorxur ki, vəzifələrindən uzaqlaşdırılmış hakimlər işlərinə qayıtsalar, Zərdarinin məhkəmə işini qaldıracaqlar "-deyə Mətin bildirib.
Keçən il fevralın 18 - də hakim Xalq Partiyası və Nəvaz Şərifin iştirakı ilə koaliasiya yaradılıb. Tərəflər arasındakı ilkin razılığa görə, keçən il prezident seçkiləri zamanı Müşərrəfin əmri ilə işdən uzaqlaşdırılmış hakimlər aprelin 30-dək öz vəzifələrinə bərpa olunmalı idilər. Şərif mətbuata açıqlamasında bildirib ki, Xalq Partiyası hakimlərin işə qayıtması ilə əlaqədar verdiyi vədinə əməl etməyib.
