...

Azərbaycan politoloqları müxalifətin seçkini bütövlükdə boykot edəcəyinə inanmırlar

Siyasət Materials 20 May 2008 12:06 (UTC +04:00)

Azərbaycan, Bakı, 20 may / Trend , müxbir E.Babayev, C.Babayeva/ Azərbaycan müxalifəti prezident seçkisini boykot etmək imkanında deyil. "Müxalifət daxilində kifayət qədər qondarma liderciklər var və onlar seçkidə iştirak edərək boykot taktikasının əhəmiyyətini aşağı salacaqlar" çərşənbə axşamı Trend -a politoloq Zərdüşt Əlizadə ölkədə seçkiqabağı vəziyyəti şərh edərkən deyib.

Azərbaycanda prezident seçkisi oktyabrın 15-də keçiriləcək.

Üç müxalifət partiyasını (Xalq Cəbhəsi, Vətəndaş və İnkişaf, Liberal) özündə birləşdirən "Azadlıq" bloku seçkini boykot etmək niyyətindədir. Amma bu taktika digər müxalifət partiyaları tərəfindən dəstəklənmir. Belə ki, Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil etdikləri partiyalar tərəfindən irəli sürülüb. Ümid, Klassik Xalq Cəbhəsi, Böyük Quruluş, Bütöv Azərbaycan, Demokratik İslahatlar partiyaları da seçkidə iştirak barədə qərar veriblər. Bir neçə gün öncə isə Azərbaycan Naminə İctimai Forumun rəhbəri Eldar Namazov müstəqil şəkildə seçkilərdə iştirak edəcəyini açıqlayıb.

Hakim Yeni Azərbaycan Partiyası (YAP) indiki prezident İlham Əliyevin namizədliyini irəli sürəcəyini açıqlayıb.

Əlizadənin fikrincə, müxalifət daxilində seçkidə iştiraka münasibət fərqli olduğundan, boykot taktikasının əhəmiyyəti heçə enir: "Boykot taktikası mənasızdır. Seçkidə iştirak etmək lazımdır. Boykot o halda təsirli olur ki, hamı bu yolu tutur. Real müxalifət rəhbərlərinin strateji səhvi odur ki, seçkiarası dövrdə saxta müxalifətdən xilas ola bilməyiblər. Müxalifət liderləri arasında o qədər rəqabət var ki, istənilən adamla sazişə gedərək onları müxalifət statusuna mindirirlər. Buna görə də boykot taktikası alınan deyil", politoloq əlavə edib.

Politoloq Hikmət Hacızadə Trend -a bildirib ki, müxalifətin boykot qərarı Seçki Məcəlləsinə nəzərdə tutulan əlavə və dəyişikliklərdən asılıdır. "Məcəllədə mürtəce maddələr mövcuddur. İmzatoplama və təbliğat kampaniyası müddətinin azaldılması, namizədin qeydiyyat depozitinin 33 min manatdan 300 min manata qaldırılması müxalifəti boykota sövq edəcək" - Hacızadə bildirib.

Onun sözlərinə görə, Seçki Məcəlləsi nəzərdə tutulan əlavə və dəyişikliklə Milli Məclis tərəfindən qəbul olunsa, müxalifətdən seçkiyə qatılan olmayacaq.

"Müsavat Partiyası prezident seçkisində iştirak etmək istəyir, lakin İsa Qəmbər istəsə belə, 300 min manatı tapa bilməyəcək", politoloq əlavə edib.

Hacızadənin fikrincə, müxalifətin ümumi boykot qərarı qəbul etməsi effektiv ola bilər. "Boykot qərarı ilə bağlı müxalifətdə fikir ayrılığı var. Müxalifətin bir hissəsi seçkini teatr adlandırır və bu teatrda iştirak etməkdən imtina edir. Digər hissəsi isə seçki teatr olacağı təqdirdə də, seçkidən tribuna kimi istifadə edəcəyini bildirir" - politoloq qeyd edib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti