Azərbaycan, Bakı, 23 iyun/ Trend , müxbir E.Babayev/ Azərbaycanın müxalif "Azadlıq" blokunun prezident seçkisini boykot etmək barədə son qərarı hələ verilməyib. "Seçkiləri boykotla bağlı son sözü blokun yaxın vaxtlarda keçiriləcək Məclisi deyəcək" - bazar ertəsi Trend -a blokun həmtəsisçisi, Milli Birlik Hərəkatının lideri Lalə Şövkət Hacıyeva deyib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları da seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Hacıyeva bildirib ki, ölkədə seçkiqabağı mühit qeyri-demokratikdir və normal rəqabət mühiti yoxdur. Bu səbəbdən də, istər cəmiyyətdə, istərsə də siyasi arenada bir süstlük var. Hacıyevanın sözlərinə görə, Milli Məclisin qərarı ilə Seçki Məcəlləsinə edilən əlavə və dəyişikliklər seçkinin demokratik keçiriləcəyini şübhə altına alıb. Seçki kampaniyasının müddətinin120 gündən 75 günə endiriməsi, dövlət KİV-də namizədlərə seçki təbliğatının aparılmasının qadağan edilməsi və başqa məsələlər seçkiqabağı vəziyyəti daha da pisləşdirib. "Hələlik bu dəyişikliklər dövlət başçısı tərəfindən təsdiqlənməyib. Ümumiyyətlə, mümkündür ki, hakimiyyət bizim tələbəlrimizin müəyyən bir qismini yerinə yetirsin" - deyən Hacıyeva xatırladıb ki, təmsil etdiyi blok siyasi məhbusların və həbsdə olan jurnalistlərin azadlığa buraxılması, siyasi partiyaların fəaliyyətinə normal şərait yaradılması və bir neçə başqa məsələ qaldırıb. Bunlar gerçəkləşərsə, blok boykotla bağlı bəyanatına baxa bilər. "Biz blok olaraq seçkiyə tam hazırıq" - deyə o əlavə edib.
Məqalə müəllifi ilə əlaqə ünvanı: [email protected]
