Azərbaycan, Bakı, 03 iyul/ Trend , müxbir E.Babayev / Azərbaycan Milli Televiziya və Radio Şurası (MTRŞ) ölkənin müstəqil televiziyalarındakı bəzi canlı verilişlərdə tamaşaçılar tərəfindən göndərilən SMS-lərdə əxlaqa zidd ifadələrin yer almasını yolverilməz hesab edir. "Belə halları yolverilməz sayırıq və kanallara tövsiyə edirik ki, bu kimi çatışmamazlıqları aradan qaldırsınlar", - deyə cümə axşamı Trend -a MTRŞ sədri Nuşirəvan Məhərrəmli bildirib.
Trend -un arayışı: Azərbaycanda ölkə üzrə 7 televiziya kanalı yayımlanır. Az.TV istisna olmaqla, digər kanallar bir sıra verilişlərində tamaşaçılardan canlı şəkildə SMS-lər qəbul edir. Bu SMS-lərin bir qismində Azərbaycanın milli-mənəvi dəyərlərinə zidd ifadələr yer alır.
Məhərrəmli bildirib ki, SMS-lərdə yer alan fikirlərin bir qismi ədəbi dildə işlədilən ifadələrdir. "Yəni hüquqi baxımdan bizim bu işlərə qarışmaq ixtiyarımız yoxdur. Amma SMS-lərdə Azərbaycan xalqının ümumi milli şüur səviyyəsinə uyğun olmayan məsələlər olmamalıdır. Biz kanallara tövsiyələr veririk ki, belə hallara yol verməsinlər. Amma qanunvericilik yolu ilə bizim tədbir görməyimiz mümkünsüzdür. Ancaq biz lisenziyanın uzadılması vaxtı gəlib çatdıqda bu məsələyə baxa bilərik və həmin kanalın nəzərinə çatdıra bilərik ki, siz bizim tövsiyələri nəzərə almamısınız, ona görə də sizinlə işləmək istəmirik", - deyən Məhərrəmli vurğulayıb ki, MTRŞ ümumiyyətlə belə halların baş verməməsinə çalışır. "Kanallar bizə bildirirlər ki, orada redaktorlar fəaliyyət göstərir və bayağı ifadələri çıxarırlar. Yəqin həmin redaktorlar bütün gün ərzində yerlərində oturmurlar və bu səbəbdən belə hallar baş verir", - deyə o əlavə edib.
Məqalə müəllifi ilə əlaqə ünvanı: [email protected]
