Azərbaycan, Bakı, 22 avqust / Trend , müxbir C.Babayeva/ Müxalif Azərbaycan Milli Demokrat Partiyasının (AMDP) növbədənkənar IV qurultayının vaxtı müəyyən olunub. Partiyanın qurultaya hazırlıq üzrə Təşkilat Komitəsinin sədri Oqtay Xəlillinin cümə günü Trend -a bildirdiyinə görə, AMDP-nin qurultayı avqustun 24 - də "Bakı" kino -teatrında keçiriləcək.
Xəllilinin bildirliyinə görə, AMDP qurultayın keçirilməsi üçün "Bakı" kino-teatrının ayrılması ilə bağlı dünən Bakı Şəhər İcra Hakimiyyətinə müraciət edib. "Cümə günü BŞİH- dən gözlənilmədən müsbət cavab məktubu alınıb", - deyə o bildirib.
Trend -un arayışı: AMDP 1993 - cü ildə yaradılıb və ilk adı "Boz Qurd" olub. 1994 - cü ildə Ədliyyə Nazirliyində dövlət qeydiyyatına alınıb. 1995 - ci ildə Ali Məhkəmə partiyanın adının müvafiq olmadığını əsas gətirərək, "Boz Qurd"un dövlət qeydiyyatını ləğv edib. Partiya qeydiyyat problemini həll etmək üçün 1999 - cu ildə keçirdiyi ikinci qurultayında adını dəyişib və Milli Demokrat Partiyası adlandırılıb. Lakin Ədliyyə Nazirliyi partiyanı qeydiyyata almaqdan imtina edir. Partiyanın keçmiş sədri, sabiq daxili işlər naziri İsgəndər Həmidov 1995 -2004 - cü illərdə həbsdə olub. 15 il azadlıqdan məhrum edilən Həmidov 2004 - cü ildə prezidentin əfv fərmanı ilə azadlığa çıxıb.
Bu ilin aprelində İsgəndər Həmidov partiya sədrliyindən istefa verib. O, istefasını partiyada sədrliyə layiq şəxslərin olması və onlara yol açmaq arzusu ilə izah edib.
Xəlillinin sözlərinə görə, qurultayın gündəliyində əsas məsələ partiya sədrinin seçilməsidir. "Bu günə qədər AMDP-nin Məclis sədri Tufan Kərimli rəsmən partiya sədrliyinə namizədliyini irəli sürüb. "Milli Yol" qəzetinin baş redaktoru Şahin Ağabəyli sədrliyə namizədliyini irəli sürmək istəyində olduğunu bildirsə də, rəsmən ərizə təqdim etməyib. Qurultayın gedişində sədrliyə iddialıların namizədliklərini irəli sürəcəyi gözlənilir", -deyə o bildirib. Xəlilli özünün partiya sədrliyinə namizədliyini irəli sürmək niyyətində olmadığını da qeyd edib.
Qurultayda AMDP-nin oktyabrın 15- də keçiriləcək prezident seçkisində iştirak formasının müəyyənləşdiriləcəyini də bildirən Xəlilli partiyada seçkidə iştirak etmək və boykot tərəfdarlarının sayının bərabər olduğunu bildirib.
Xəlilli bildirib ki, AMDP-nin keçmiş sədri İsgəndər Həmidov qurultaya dəvət olunsa da, onun iştirak edib - etməyəcəyi məlum deyil.
Məqalə müəllifi ilə əlaqə ünvanı: [email protected]
