Belçika, Brüssel, 23 fevral/ Trend , müxbir A. İsmayılova/
Avropa Parlamentinin vitse-prezidenti Luiza Morqantini ilə Trend -un Yaxın Şərq Redaksiyasının müsahibəsi
- Qəzzədə humanitar böhranın aradan qaldırılması üçün Avropa Parlamentinin nümayəndəsi kimi hansı tədbirləri görmək niyyətindəsiniz?
- Qəzzəni təkcə humanitar böhran qorxusu gözləmir: ilk növbədə Qərb sahilində və Qəzzədə Fələstin əhalisinin azadlığının olmaması həll olunmamış məsələ olaraq qalır, habelə 1967-ci ildə ərazilərin təcavüzündən sonra BMT-nin qəbul etdiyi qətnamələrin İsrail tərəfindən pozulması faktı mövcuddur.
Eyni zamanda, Qəzzədəki humanitar fəlakət ciddi xəstə olan insanlar istisna olmaqla, dinc əhali üçün bütün sərhədləri bağlayan və embarqo tətbiq edən İsrailin siyasətinin nəticəsidir. Lakin hətta xəstələrin buraxılmaması halları da baş verirdi. Bu sərt tədbirlər nəticəsində təcrid və xəstəxanalara aparan "Erets" nəzarət-buraxılış məntəqəsinin bağlanması səbəbindən böyük sayda dinc fələstinli həlak olub.
İsrail ordusunun Qəzza Zlağındakı sonuncu əməliyyatı hərbi cinayətdir. Ona görə də BMT-nin açıq istintaqına ehtiyac var.
Bu yaxınlarda Qəzzə Zlağında gördüklərim Cenevrə konvensiyalarının kobud pozulmasıdır: təcavüzün hədəfi məktəblər, xəstəxanalar, sənaye obyektləri və mülki məskənləri olub.
Avropa Parlamentinin üzvü kimi regionda işlərin hazırkı vəziyyətini parlamentarilərin diqqətinə çatdırmağa çalışıram. Xüsusilə də, deputatların işğal altında yaşamağın nə demək olduğunu bilmələri, fələstinlilərin təkcə İsrail ərazilərini atəşə tutan ekstremistlər deyil, üç milyondan çox fələstinlinin yaşamaq, işləmək, uşaqlarını məktəbə göndərmək üçün sülh yolu ilə İsrailin təcavüzünə müqavimət göstərən insan olduğunu görmələri üçün Avropa Parlamentinin nümayəndə heyətinin Qərb Sahili və Qəzzəyə səfərlərini təşkil etməyə çalışıram. Misal üçün, Bliində gənc fələstinlilər, israillilər və əcnəbilər hələ Cimmi Karterin Aparteidin (irqi təcrid) simvolu adlandırdığı divarın tikintisinə qarşı dinc etiraz aksiyası keçirirlər. Mən əlavə etmək istərdim ki, bu divar İsrail dövlətinin Fələstin ərazilərini ilhaq etməsi üçün alətdir.
Biz bütün birgə sazişlərin dondurulmasını, insan haqları və beynəlxalq hüquqa hörmət etməyən İsraillə əməkdaşlığın genişləndirilməsini dayandırmağı özündə əks etdirən Avropa siyasətini daha qəti aparmalıyıq.
Avropa Parlamenti İsraillə əlaqələrin genişləndirilməsindən imtina edib və Qəzzədəkı mühasirənin aradan qaldırılması üçün bir neçə qətnamə qəbul edib.
Fələstin hökumətinin və ərazilərin birliyi üçün işi davam etdirmək lazımdır. Əlbəttə ki, Aİ İsrailin dinc əhalisinə qarşı hücumların əleyhinədir.
- İsrailin sağ blokunun rəhbərliyi altında yaradılacaq yeni hökumət fələstinlilərlə dialoqdan imtina edəcəyi təqdirdə, Aİ-nin bu ölkə ilə münasibətləri necə inkişaf edəcək?
- Mən çox ümid edirəm ki, Avropa İttifaqına daxil olan bütün ölkələrin rəhbərləri anlayacaqlar ki, İsrail hökumətə rəhbərliyi ehtimal olunan sağçılardan qorunmalıdır. Ümid edirəm ki, Aİ daha ayıq hərəkət edəcək: əgər biz "iki xalq iki dövlət üçün" ideyasını dəstəkləyiriksə, onda nəinki Avropa, beynəlxalq ictimaiyyət də yahudi məskənləri siyasətinə, blokadaya, embarqo və Qərb Sahilindəki hərbi qarşıdurmaya son qoymalıdır. Üstəlik, İsrailin siyasətini dəyişmək üçün ona təzyiq göstərməliyik: nəhayət ki, ABŞ-ın hər il İsrailə göndərdiyi yardımı dayandırmasından sonra, sonuncu, məskənlərin tikintisini bir müddətlik dayandırıb.
- HƏMAS ilə hakim FƏTH partiyaları arasında barışığın əldə olunmasına yardım göstərməklə bağlı planınız varmı. Əgər varsa bu barədə nə deyə bilərsiniz?
- Düşünmürəm ki, mənim belə bir imkanım var, lakin Fələstinin vahidliyi üçün tərəfimizdən atılan müəyyən addımlar buna yardım göstərə bilər. Fələstinlilərin əlbəttə ki, digər ölkələrin yardımı və öz səyləri sayəsində vahid dövlət yarada biləcəyinə əmin olduğumuz zaman, Aİ onu (Fələstin hökumətini) tanımalı və əvvəlki səhvlərini təkrarlamamalıdır.
HƏMAS demokratik yolla seçkilərdə qalib gəldiyi zaman, biz nəinki bu hökuməti (HƏMAS-ın rəhbərlik etdiyi), həmçinin fələstinli məhbuslar, ən əsası Mərvan Barqutinin səyləri sayəsində yaradılan vahid Fələstin hökumətini tanımaqdan imtina etdik.
Fələstinlilərin ədaləti hiss etmək, azadlıqdan və müstəqillikdən zövq alması vaxtı gəlib çatıb. Azadlıq və müstəqillik həm fələstinlilər, həm də israillilər üçün sülh və təhlükəsizliyin əldə olunması istiqamətində yeganə yoldur.
Məqalə müəllifi ilə əlaqə ünvanı - [email protected]
