Azərbaycan, Bakı, 02 noyabr / Trend , müxbir A.Hüseynbala/
Azərbaycanın hakim partiyası Asiya Siyasi Partiyaları Beynəlxalq Konfransının daimi komitəsinə üzv qəbul edilib.
"Asiya Siyasi Partiyaları Beynəlxalq Konfransı (ICAPP) daimi komitəsinin həmsədri, ICAPP-ın baş katibi Çunq Eu-Yonqun göndərdiyi məktubda qeyd edilir ki, bu qərar partiyanın Asiya Siyasi Partiyaları Beynəlxalq Konfransının Asiyada sülhün və əmin-amanlığın bərqərar olması üçün həyata keçirdiyi fəaliyyət sahəsində xüsusi xidmətləri nəzərə alınaraq verilib", - Trend -un məlumatına görə, bazar ertəsi Yeni Azərbaycan Partiyasının internet saytında bildirilib.
Trеnd Nеws-un аrаyışı: YAP 1992-ci ildə о vаxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 16 ildir hakim partiya olan YAP-ın indiki sədri Prezident İlham Əliyevdir.
Asiya Siyasi Partiyaları Beynəlxalq Konfransının sentyabrın 23-26-da Qazaxıstan paytaxtı Astanada keçirilən V Baş Assambleyasında YAP sədrinin müavini və icra katibi Əli Əhmədovun yaxından iştirakı təşkilatın işinin daha da uğurlu alınmasında bir töhfə olub. "Asiya Siyasi Partiyaları Beynəlxalq Konfransı daimi komitəsinin 2010-cu ilin fevral ayında Nepalın paytaxtı Katmandu şəhərində keçiriləcək 12-ci iclasında YAP daimi üzv kimi təmsil olunacaq", - məlumatda qeyd edilir.
Məqalə müəllifi ilə əlaqə ünvanı: [email protected]