Azərbaycan, Bakı, 3 noyabr /Trend, müxbir T.Cəfərov/
İran Xəzərin çirklənməsinin qarşısını almaq məqsədi ilə Xəzəryanı ölkələrin gördüyü işləri qənaətbəxş hesab etmir.
"Xəzərin çirklənməsinin qarşısını almaq məqsədi ilə indiyədək Xəzəryanı ölkələr qənaətbəxş işlər görməyiblər", - İran İslam Respublikası xarici işlər nazirinin müavini, Prezidentin Xəzər məsələləri üzrə xüsusi nümayəndəsi Məhəmməd Mehdi Axundzadə çərşənbə günü Trend-ə açıqlamasında bildirib.
Çərşənbə günü Bakıda beş Xəzəryanı ölkənin xarici işlər nazirləri müavinlərinin Xəzərdə təhlükəsizlik sahəsində əməkdaşlıq haqqında saziş layihəsinin razılaşdırılması üzrə iclası başlayıb. Xəzəryanı dövlətlər 2003-cü ilin noyabrında Xəzərdə dəniz mühitinin qorunması üzrə Çərçivə Konvensiyası imzalayıblar.
1998-ci ilin iyulunda Qazaxıstanla Rusiya arasında yeraltı sərvətlər üzrə suveren hüquqların həyata keçirilməsi məqsədi ilə Xəzərin şimal hissəsində dəniz dibinin bölünməsi haqqında saziş imzalanıb, 2002-ci ilin mayında isə həmin sazişə müvafiq protokol imzalanıb.
2001-ci il noyabrın 29-da və 2003-cü il fevralın 27-də Qazaxıstanla Azərbaycan arasında Xəzər dənizinin dibinin bölünməsi haqqında saziş və ona müvafiq protokol imzalanıb.
Həmçinin, 2003-cü il mayın 14-də Qazaxıstan, Azərbaycan və Rusiya arasında Xəzər dənizinin həmsərhəd hissələrinin bölünməsi xəttinin qovuşma nöqtəsinə dair saziş imzalanıb.
Axundzadə hesab edir ki, Xəzəryanı ölkələr dənizin çirklənməsinin qarşısını almaq məsələsinə indiyədək bir o qədər diqqət yetirməyiblər. Lakin o, hazırda bu sahədə ilkin addımların atıldığını qeyd edib.
"Hazırda Xəzərin çirklənməsinin qarşısını almaq məqsədi ilə iki protokol müzakirə olunur və əgər bu protokolların müzakirəsi müsbət nəticələnərsə, Xəzəryanı ölkələrin əhalisinin sağlamlığı təmin olunar", - Axundzadə deyib.
Noyabrın sonunda Xəzəryanı ölkələrin ekologiya nazirlərinin sammiti Qazaxıstanda keçiriləcək.
