Azərbaycan, Bakı / Trend müxbir S.İlhamqızı/ Azərbaycanda bir sıra müxalifət partiyaları qərargahsız fəaliyyət göstərir. Milli Demokratiya, Böyük Quruluş, Azadlıq, Milli İstiqlal, Xalq Cəbhəsi və digər partiyaların mərkəzi qərargahları yoxdur.
Azərbaycanda dövlət qeydiyyatından keçmiş partiyalara Dövlət Əmlakının İdarə Edilməsi üzrə Dövlət Komitəsi tərəfindən müvafiq yerlər ayrılır. Həmçinin partiyalar özləri özəl obyektlərdə icarə müqavilələri əsasında yerləşə bilirlər.
Bir neçə partiya artıq neçə illərdir qərargahsız, ayrı-ayrı obyektlərdə müvəqqəti məskunlaşmaqla fəaliyyət göstərir.
Azərbaycan Milli İstiqlal Partiyası (AMİP) Bakının Azadlıq prospektində böyük sahəsi olan qərargahından çıxarıldıqdan sonra indiyədək ayrı-ayrı yerlərdə özəl icarədarlarla müqavilələr bağlayıb. AMİP-in mərkəzi aparatı hazırda partiyanın Nəsimi rayon təşkilatında fəaliyyət göstərir.
Milli Demokratiya (Boz Qurd) Partiyası (MDP) Ədliyyə Nazirliyinə dəfələrlə müraciət və etirazlar ünvanlamasına baxmayaraq, hələ də dövlət qeydiyyatına alınmayıb. Ona görə partiyaya dövlət qurumu tərəfindən qərargah ayrılmayıb. Hazırda MDP-nin heç bir ofisi yoxdur və partiya öz toplantılarını Klassik Xalq Cəbhəsi Partiyasının qərargahında keçirir.
Böyük Quruluş Partiyası (BQP) isə Ədalət Partiyasının qərargahında müvəqqəti məskunlaşıb. Partiya 2001-ildə yaradılıb və o vaxtdan indiyədək qərargahla təmin olunmayıb. BQP-yə Dövlət Əmlak Komitəsi tərəfindən təklif olunan yer yararsız vəziyyətdə olduğu üçün partiya təklifdən imtina edib. BQP ona lazımi şəraiti olan yer ayrılmamasına etiraz olaraq Dövlət Komitəsini məhkəməyə verməyə hazırlaşır.
Başqa bir partiya - Azadlıq Partiyası isə artıq Dövlət Komitəsini məhkəməyə verib. Azadlıq Partiyası da dövlət qeydiyyatının olmasına baxmayaraq, ona fəaliyyət üçün müvafiq yer ayrılmamasından şikayətlənir.
Azərbaycan Xalq Cəbhəsi Partiyası (AXCP) Bakının Xaqani küçəsi 33 ünvanında yerləşən binadan ötən il çıxarılıb. 15 il həmin ünvanda - "Azadlıq" qəzetinin redaksiyasında müvəqqəti məskunlaşmış AXCP hazırda heç bir ofisə malik deyil. AXCP-yə Əmlak Komitəsi tərəfindən təklif olunan yer fəaliyyət üçün yararsız hesab edilib. Bir müddət ADP-nin qərargahında yerləşən partiya oradan da çıxıb və indi toplantılarını partiya üzvlərinin evlərində keçirir.
Dövlət Əmlakının İdarə Edilməsi üzrə Dövlət Komitəsindən bildirilib ki, bu qurum öz Əsasnaməsinə görə yalnız dövlət təşkilatlarına yer ayırmalıdır. Özəl təşkilatlara, siyasi partiyalara yer ayırmağa borclu deyil. Sadəcə olaraq, dövlətin balansında olan əmlakın istifadəyə, icarəyə verilməsi səlahiyyəti bu Komitədə olduğu üçün partiyalar ora müraciət edir. Dövlət Komitəsi müraciətlərə baxır, dövlət əmlakı sayılan münasib yerləri təklif edir və qarşı tərəf razılıq verdikdə həmin partiyalarla icarə müqaviləsi bağlanır. İcarə haqqı isə Nazirlər Kabinetinin müəyyənləşdirdiyi məbləğ əsasında təyin olunur. Dövlət Komitəsi indiyədək bir neçə partiyalarla belə müqavilələr bağlayıb.