Azərbaycan, Bakı, 19 mart / Trend ", müxbir E.Hüseynli/ Azərbaycanda yaz mövsümü ilə əlaqədar meşəsalma işlərinə başlanılıb. Bu barədə Trend a Ekologiya və Təbii Sərvətlər Nazirliyinin (ETSN) mətbuat xidmətinin rəhbəri vəzifəsini icra edən İradə İbrahimova məlumat verib.
Azərbaycan prezidentinin 2003-cü ildəki fərmanı ilə təsdiq olunmuş "Meşələrin bərpa edilməsinə və artırılmasına dair Milli Proqrama (2003-2008-ci illər)" görə ölkənin bütün regionlarını əhatə etməklə 70 min hektara yaxın sahədə meşələr bərpa olunmalı və yeni meşələr salınmalıdır. İndiyə qədər Milli Proqramın icrası ilə əlaqədar olaraq 50 min hektar sahədə pozuq meşələr qiymətli ağac və kollar hesabına bərpa edilib və yeni meşələr salınıb. Bu müddət ərzində 150 mln. ədəddən çox müxtəlif çeşiddə ağac, kol ting və toxmacarları yetişdirilib.
İbrahimova deyib ki, yaz mövsümü ilə əlaqədar 2 mln. ədəddən çox ağac və kol cinsləri əkilib. Onun sözlərinə görə, yaz meşə və yaşıllıq salma işlərinə Hirkan zonasında digər meşəbitmə zonalarından tez başlanılıb. Bu da nəmli subtropik zona olan bu ərazidəki ağaclarda şirə axımının digər meşəbitmə zonalarından fərqli olaraq 10-12 gün tez başlanması ilə əlaqədardır. Lənkəran, Astara, Masallı, Cəlilabad Meşələrin Mühafizəsi və Bərpası Müəssisələri tərəfindən cari ildə relikt ağac cinslərindən olan dəmir ağacı, azad ağacı, şabalıdyarpaq palıd, hirkan şümşədi, gözəl ağcaqayın və s. cinslərdən olan ağaclar dominantlıq etməklə 500 ha sahədə yeni meşəliklərin salınması işləri proqnozlaşdırılıb. Bundan yaz mövsümündə 200 hektarı icra edilməlidir.
Tuqay meşələrinin bərpa edilməsi və cins tərkibinin yaxşılaşdırılması məqsədilə son 6 ildə Kür qırağı ərazilərdə 5,5 min hektardan artıq yeni meşələr salınıb.
Cari ildə bu ərazilərdə 1 min hektardan artıq sahədə yeni meşələrin salınması proqnozlaşdırılıb. Bundan 400 hektarı isə yaz mövsümündə salınmalıdır. Ağstafa, Tovuz, Şəmkir, Yevlax, Goranboy, Sabirabad, Ağcabədi Meşələrin Mühafizəsi və Bərpası Müəssisələri tərəfindən artıq bu ərazilərdə yaz meşəsalma işlərinə başlanılıb və 300 hektardan artıq sahədə işi yekunlaşdırılıb.
Respublika meşələrinin təxminən 95%-ə yaxını dağ və dağətəyi bölgələrdə, 5%-dən bir qədər çoxu isə düzən ərazilərdə, əsasən Kür-Araz, Alazan-Əyriçay vadilərində yayılıb.
Ümumiyyətlə, qlobal miqyasda götürdükdə, Azərbaycanda meşələrin sahəsi çox azdır. Hər nəfərə cəmi 0,12 ha meşə sahəsi düşür ki, bu da dünya üzrə müvafiq orta rəqəmdən 4 dəfə azdır. Bunun optimal həddi Azərbaycan üçün hər adambaşına 0,25-0,30 hektar olmalıdır.