Azərbaycan, Bakı,09 aprel / Trend , müxbir C.Babayeva/ Azərbaycan telekanalları "Azadlıq" qəzetinin əməkdaşı Aqil Xəlildən üzr istəməyəcəklərini bildiriblər.
Xəlil AzTV, "Lider", "Space" və ATV televiziya kanallarına məktub göndərərək, efir vasitəsilə ondan üzr istəmələrini və təkzib vermələrini tələb edib. Əks- təqdirdə, onları məhkəməyə verəcəyini bildirib.
Aprelin 7-də həmin televiziyalar Respublika Prokurorluğunun Xəlilin döyülməsilə bağlı açıqladığı istintaq məlumatını yayıblar. Məlumatda jurnalistin martın 13-də qeyri-ənənəvi cinsi oriyentasiyaya malik olan şəxslər tərəfindən bıçaqlandığı bildirilirdi.
Aqil Xəlil baş prokuror Zakir Qaralova müraciət edib. Xəlil Ağır Cinayətlərə Dair İşlər Üzrə İstintaq İdarəsinin müstəntiqi Əli Quliyevin hərəkətlərindən Baş prokuror Zakir Qaralova şikayət ünvanlayıb. Şikayətdə 22 fevral döyülmə və 13 mart bıçaqlanma faktları ilə bağlı məlumat verəndən sonra, aprelin 3-də və 4-də baş verənlərə aydınlıq gətirib.
"Azadlıq" qəzetinin bıçaqlanan jurnalistinin vəkili isə, Baş Prokurorluğun müstəntiqi Əli Quliyevi məhkəməyə verib.
Vəkil Elçin Sadıqov vəkil hüquqlarının, azadlıq və toxunulmazlıq, habelə ədalətli məhkəmə araşdırması hüquqlarının pozulduğunu iddia edir və Baş Prokurorluğun Ağır Cinayətlərə Dair İşlər Üzrə İstintaq İdarəsinin müstəntiqi Əli Quliyevin cəzalandırılmasını və vəkilə dəyən ziyanın ödənilməsini tələb edir.
ATV kanalının Xəbərlər Departamentinin direktoru Natiq İbrahimov çərşənbə günü Trend -a bildirib ki, Xəlilin müraciəti daxil olacağı təqdirdə belə, kanalın müxbirdən üzr istəmək fikri yoxdur.
"İstintaq materialındakı faktlar göstərir ki, "Azadlıq" qəzetinin müxbiri Aqil Xəlil, həqiqətən, bu əməli törədib və hazırlanmış material dəqiqləşdirildikdən sonra şərhsiz efirə verilib. Aqil Xəlil məhkəməyə müraciət edə bilər" - İbrahimov əlavə edib.
"Space" telekanalının "Hər Gün" xəbərlər xidmətinin rəhbəri Elman Gədiklinin Trend -a bildirdiyinə görə, "Azadlıq" qəzetinin müxbiri Aqil Xəlillə bağlı efirə verilən material Respublika Baş Prokurorluğunun rəsmi məlumatı olub.
"Dövlətçiliyə xidmət etdiyimizə görə, həmin materialı efirə vermək borcumuz olub. Aqil Xəlilin jurnalistikada olması ümumilikdə jurnalistika aləminə ləkədir. O, məhkəməyə müraciət edə bilər" -Gədikli bildirib.
Bu məsələ ilə bağlı "Lider" televiziyası şərh verməkdən imtina edib.
AzTV-nin mətbuat xidmətinin rəisi Xatirə Qasımova isə, Trend -a Xəlilin müraciətinin daxil olmadığını və buna görə də daxil olmayan müraciətə şərh verməyəcəyini deyib.
Məqalə müəllifi ilə əlaqə ünvanı: [email protected]
