Azərbaycan, Bakı, 07 avqust / Trend , muxbir H.Bağırov /
İrandan Azərbaycana qaçaqmalçılıq yolu ilə narkotik vasitələr gətirməkdə ittiham olunan Lənkəran şəhər sakinin məhkəməsi başa çatıb.
Trend -un məlumatına görə, cümə günü Ağır Cinayətlərə Dair İşlər üzrə Məhkəmədə İsmayılova Elzadə Talıb qızı Cinayət Məcəlləsinin qaçaqmalçılıq (206.3.2), satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldəetmə, saxlama, göndərmə, daşıma və ya satma (234.4.1, 234.4.3) maddələri ilə təqsirli bilinərək məhkəmənin hökmü ilə 10 il müddətinə azadlıqdan məhrum edilib.
Bu ilin mayında Astara Gömrük İdarəsinin Gömrük hüquqpozmalarına qarşı mübarizə şöbəsi tərəfindən görülmüş tədbirlər nəticəsində İsmayılova İrandan gələrkən Astara Gömrük İdarəsinin Sərnişin şöbəsində şəxsi yoxlamaya cəlb edilib. Onun üzərindən şəffaf rəngli polietilenə bükülmüş üç ədəd bağlamada xalis çəkisi 182,832 qram narkotik vasitə - heroin aşkar olunaraq götürülüb.
Məqalə müəllifi ilə əlaqə unvanı: [email protected]
