Azərbaycan, Bakı, 24 avqust / Trend , müxbir K.Zərbalıyeva /
Suraxanı rayonu ərazisində, Yeni Günəşli qəsəbəsi, V massiv, 33 ünvanında yerləşən "Fatimeyi Zəhra" məscidinin tikintisi Rayon İcra Hakimiyyəti tərəfindən dayandırılıb. "Fatimeyi Zəhra" dini icmasının üzvləri isə məscidə buraxılmır.
Dini icmanın nümayəndəsi, vəkil Rövşən Şirəliyev bazar ertəsi Trend -a bildirib ki, Suraxanı Rayon İcra Hakimiyyətinin məscidin tikintisini dayandırması qanunsuzdur və bununla bağlı məhkəmənin qərarı olmalıdır.
Vəkil bildirib ki, Suraxanı Rayon İcra hakimiyyəti məscidin inşa olunduğu torpaq sahəsinin Bakı Şəhər İcra Hakimiyyəti başçısının sərəncamı ilə onlara verildiyini və məscidin qanunsuz tikildiyini əsas gətirərək, məscidin və ərazidəki yardımçı tikililərin sökülməsi tələbi ilə məhkəməyə müraciət edib.
Şirəliyev bildirib ki, Bakı Şəhər İcra Hakimiyyəti başçısının 1996-cı il tarixli sərəncamı ilə Yeni Günəşli qəsəbəsində "Fatimeyi Zəhra" məscidinin tikintisi üçün 1 ha 30 sot torpaq sahəsi ayrılıb. Tikintinin aparılması üçün müvafiq sənədlər isə Bakı Şəhər İcra Hakimiyyəti tərəfindən hazırlanıb.
Lakin Bakı Şəhər İcra Hakimiyyəti 2002-ci ilin sonunda, həmin torpaq sahəsi uzun müddət istifadə olunmadığına görə, sərəncamın ləğv olunması və torpaq sahəsinin Suraxanı Rayon İcra Hakimiyyətinə idman və əyləncə kompleksinin tikintisi üçün ayrılması barədə sərəncam verib. Həmin sərəncamdan sonra icmanın üzvləri Bakı Şəhər İcra Hakimiyyəti başçısının müavini Rauf Pənahovla görüşüb və o, həmin sərəncamın səhvən verildiyini və tikintinin aparılması üçün narahatlıq olmadığını bildirib.
Bu il Suraxanı Rayon İcra Hakimiyyəti həmin torpaq sahəsinin onlara ayrıldığını əsas gətirərək məhkəməyə müraciət edib.
Hazırda 2 saylı Yerli İqtisad Məhkəməsi iddianı araşdırır. Dini icmanın nümayəndəsi Bakı Şəhər İcra Hakimiyyətinin üçüncü tərəf kimi prosesə cəlb olunması barədə vəsatət verib və vəsatət təmin olunub. Cavabdeh tərəf məhkəməyə qarşılıqlı iddia verərək Bakı Şəhər İcra Hakimiyyətinin 2002-ci il tarixli sərəncamının ləğvini və Suraxanı Rayon İcra Hakimiyyətinin qanunsuz müdaxiləsinin qarşısının alınmasını tələb edir.
Məsələ ilə əlaqədar Suraxanı Rayon İcra Hakimiyyəti ilə əlaqə saxlasaq da, əlavə məlumat almaq mümkün olmayıb.
Son bir ildə Bakıda qanunsuz tikildiyi əsas gətirilərək Məhəmməd Peyğəmbər məscidi, Neft Daşlarındakı məscid sökülüb.
Məqalə müəllifi ilə əlaqə ünvanı: [email protected]
