Azərbaycan, Bakı, 12 noyabr /Trend, müxbir M.Əliyev/
Azərbaycanda restoran rəhbərlərinin vəhşi heyvanlarla bağlı yaratdığı problemin nəticələrini düzəltmək asan olmur. Bunu cümə günü Trend-ə ekologiya və təbii sərvətlər naziri Hüseynqulu Bağırov bildirib.
"Restoran və istirahət mərkəzlərindən müsadirə olunan vəhşi heyvanlar ələ öyrəşdiyindən, onları aparıb təbiətə buraxmaq bir sıra çətinliklər yaradır", - Bağırov əlavə edib.
Ekologiya və Təbii Sərvətlər Nazirliyinin vəhşi heyvanların ayrı-ayrı istirahət mərkəzlərində qəfəslərdə saxlanılmasının qarşısını almaq məqsədi ilə Daxili İşlər və Vergilər nazirliklərinin əməkdaşları ilə birgə keçirdiyi reydlər zamanı Bakının Səbail rayonu ərazisində yerləşən "Qurd qapısı" restoranında 1 ayının, Lerik rayonu ərazisində yerləşən istirahət mərkəzində isə 3 ayının və 1 canavarın, Xətai rayonununda fəaliyyət göstərən kafedən 1 dələ, Hövsan qəsəbəsində fəaliyyət göstərən kafedən isə 2 canavarın qəfəsdə saxlanılması aşkar edilib.
Həmçinin, Abşeron rayonu Zığ şossesində yerləşən "Zeytun bağı" restoranında reyd keçirilib.Reyd zamanı sözügedən restoranda vəhşi təbiətdən götürülmüş iki ədəd ayının saxlanılması faktı aşkar edilərək qanunvericilikdə nəzərdə tutulmuş qaydada sənədləşdirilərək götürülüb.
Hazırda vəhşi heyvanın qəfəsdə saxlanmasına görə hüquqi şəxslər 5000-7500, vəzifəli şəxslər 2000-2500, fiziki şəxslər isə 200-500 manat cərimə ödəməlidirlər.
"Əfsuslar olsun ki, restoranların çoxu fiziki şəxslərin adınadır, onları hüquqi şəxs kimi cərimə etmək çətindir. Lakin əsas problem cərimə ilə yox, heyvanların gələcək aqibəti ilə bağlıdır", - nazir bildirib.
Nazir bildirib ki, Ekologiya və Təbii Sərvətlər Nazirliyi çoxlu sayda heyvanı Vəhşi Təbiətin Bərpası Mərkəzi və Reabilitasiya Klinikasında uzun müddət saxlayaraq vəhşi təbiətə qaytarmağa hazırlamalı olur.
