...

BMT-dən Azərbaycanın öncəgörücüsünə mükafat FOTO)

Cəmiyyət Materials 22 İyul 2015 14:42 (UTC +04:00)
Mələk xanım və Azərbaycan Vanqası kimi tanınan məşhur öncəgörücü və şəfaverici Nuridə Qurbanovanın Bakıda mükafatlandırma mərasimi keçirilib.
BMT-dən Azərbaycanın öncəgörücüsünə mükafat FOTO)

Azərbaycan, Bakı, 22 iyul /Trend, müxbir Vüqar İmanov/

Mələk xanım və Azərbaycan Vanqası kimi tanınan məşhur öncəgörücü və şəfaverici Nuridə Qurbanovanın Bakıda mükafatlandırma mərasimi keçirilib. Trend-in məlumatına görə, mükafatlandırma mərasimində rusiyalı qonaqlar - BMT-nin nümayəndəsi Sergey Nabatov və "Komsomolskaya Pravda" nəşrinin Tibb şöbəsinin müdiri Tatyana Yulmasova iştirak ediblər.

"INTERSAFETY" ("Beynəlxalq Təhlükəsizlik") Komitəsinin və Birləşmiş Millətlər Təşkilatının Beynəlxalq Təltiflər İttifaqının (UNCOPA) Təltiflər Şurasının qərarına əsasən N.Qurbanova "Qızıl qartal" ordeni ilə mükafatlandırılıb. Bu orden beynəlxalq təhlükəsizliyin möhkəmləndirilməsi işində göstərilən xidmətlərə, eləcə də narkomaniya, ekoloji cinayətlər və müasir qlobal təhlükələrə qarşı mübarizədə verilən töhfəyə görə təqdim edilir.

N.Qurbanova, həmçinin sağlam həyat tərzinin qorunması, xalq təbabətinin inkişafı və ictimai təhlükəsizliyin təmin edilməsi işində göstərdiyi xidmətlərə görə "Sülh missiyasının səfiri" adı verilməklə "Cəmiyyət qarşısında xidmətlərinə görə" qızıl medalı ilə mükafatlandırılıb. N. Qurbanovaya Beynəlxalq Komplementar və Xalq Təbabəti Mütəxəssisləri, Psixoloqlar və Şəfavericilər Peşəkar Tibb Assosiasiyasının "İnsanın ümumi harmonizasiyasının ənənəvi metodları üzrə təlimatçısı" sertifikatı da təqdim edilib.

S.Nabatov və T.Yulmasova qeyd ediblər ki, N.Qurbanova Rusiyada fəaliyyəti dövründə ictimai fəaliyyətdə və tibb sahəsində önəmli uğurlar əldə edib, elm dünyası tərəfindən tanınıb və xilas edilmiş insanların minnətdarlıqlarını qazanıb.

N.Qurbanova belə yüksək mükafatlara görə minnətdarlığını bildirib və vurğulayıb ki, Rusiya və Ukraynada uzun müddət işlədikdən sonra Vətənə qayıdıb və burada cəmiyyətin inkişafı, eləcə də insanların sağlamlığı naminə məhsuldar fəaliyyətini davam etdirəcək.

Tədbirin aparıcısı teleaparıcı Ruslan Həsənov idi. Baş tutmuş mətbuat konfransında qeyd edilib ki, Bakıda N.Qurbanova Fenomeni Mərkəzi yaradılıb və böyük layihə reallaşdırılır - sayt 4 dildə modernləşdirilir, jurnal və kitab buraxılır, N.Qurbanova fenomeni haqqında bədii-sənədli filmin çəkilişləri başlayır. Bundan başqa, Bakıda Nuridə Qurbanova Akademiyası da açılacaq, Akademiyada ekstrasensorika üzrə tədris keçərək sertifikat və diplom almaq mümkün olacaq. Azərbaycanda ilk dəfə insanların qeyri-adi qabiliyyətləri haqqında "Xeyirxah İşıq" kinofestivalı və Beynəlxalq Şəfavericilər və Öngörücülər Konfransı keçiriləcək. Layihə çərçivəsində Nuridə Qurbanova Fenomeni Mərkəzinin BƏƏ və Almaniyada nümayəndəlikləri açılacaq. Onun adı yaxın vaxtlarda Ginnesin Rekordlar Kitabına salınacaq. Tədbir iştirakçılarına N.Qurbanovanın Rusiyada fəaliyyəti haqqinda film nümayiş olunub.
Nuridə Qurbanova jurnalistləri Milli mətbuatın 140 illik yubileyi münasibət ilə təbrik edib və bir çox sualları cavablandırıb.

N.Qurbanova Azərbaycanın Qarabağ torpağında, Şuşa şəhərində anadan olub. O, bioenerqoinformatika elementləri ilə ənənəvi sagaltma sistemləri üzrə mütəxəssisdir, insanın fikirlərini onun nəbzi əsasında oxuya bilir, diaqnostika və müalicədə öncəgörmə və kosmobioenergetikadan istifadə edir, ağır cinayətlərin törədilmə yerlərini görmə qabiliyyətinə malikdir. Cadunu, gözdəyməni götürür. Şəxsi həyat və biznes barədə proqnoz verir. İnsanları alkoqolizmdən, narkomaniyadan və digər ağır xəstəliklərdən xilas edir.

N.Qurbanovada şəfavericilik və gələcəyi görmə qabiliyyəti onu 10 yaşında ildırım vurduqdan sonra yaranıb. Şəfavericinin fenomenal qabiliyyətləti "ENİOM" Ümumrusiya Ənənəvi Xalq Təbabəti Elmi-Tədqiqat Mərkəzi tərəfindən təsdiq edilib.

Məhsuldar fəaliyyəti sayəsində elm dünyasında tanınıb və bir sıra yüksək mükafatlara layiq görülüb. Belə ki, Moskva şəfavericiləri reyestrinə daxil edilən Nuridə Qurbanova "Rusiyada XX əsrin son onilliyinin ən yaxşı şəfavericisi" müsabiqəsinin laureatı, Rusiya filosofiya elmləri doktoru, enerji informasiya elmləri namizədi, komplementar tibb sahəsinin ən yüksək mükafatı olan "Magistr Ulduzu" ali mükafatının sahibi, M.Nostradamus adına Proskopik Elmlər Akademiyasının (NPEA) "Elmin və təcrübənin metri" adının sahibi, Azərbaycan Kütləvi İnformasiya Vasitələri Həmkarlar İttifaqının "İlin ekstrasensi", "Fəxri ekstrasens" mükafatlarının qalibi, beynəlxalq təşkilatların çoxsaylı mükafat, diplom və sertifikatlarının sahibidir.

Məqalədə:
Xəbər lenti

Xəbər lenti