Azərbaycan turizm sahəsinin mütəxəssisləri Şimali Kiprdə təcrübə keçəcəklər. Trend in verdiyi xəbərə görə, bu barədə iyunun 21-də Bakıda keçirilən İslam Konfransı Təşkilatı XİN başçılarının 33-cü sammitində iştirak etmək üçün Azərbaycana gəlmiş Şimali Kipr Türk Respublikasının (ŞKTR) İqtisadiyyat və turizm naziri Dərviş Kamal Dəniz bildirib.
"ŞKTR höküməti Azərbaycan vətəndaşlarının respublika mehmanxanalarında sərbəst surətdə işləməsinə imkan yaradacaq və bu onların peşəkarlıq keyfiyyətlərini artıracaq. Bu məsələ üzrə artıq razılıq əldə olunub", - deyə ŞKTR İqtisadiyyat və turizm naziri bildirib.
Dərviş Kamal Dəniz qeyd edib ki, Şimali Kipr Avropa turizminin ən böyük mərkəzlərindən biridir və yalnız 2005-ci ildə Şimali Kiprə 350 min turist gəlib. "Güman edilir ki, tezliklə bu göstərici 1 milyon nəfəri keçəcək", - deyə nazir bildirib və qeyd edib ki, Azərbaycan turistləri üçün Kiprdə dincəlmək üçün hər cür şərait yaradılacaq.