Azərbaycan, Bakı /müxbir Trend K.Zərbalıyeva/Daxili Qoşunların sabiq komandanı Fəhmin Hacıyevin şikayəti üzrə İnsan Haqları üzrə Avropa Məhkəməsinin qərarının icrası üzrə prosedura başlanılıb. Bu barədə məlumat verən İnsan Haqları üzrə Avropa Məhkəməsindəki səlahiyyətli nümayəndəsi Çingiz Əsgərov bildirib ki, həmin qərarda onun 3 ay müddətində icra olunması qeyd olunub. Ç.Əsgərovun sözlərinə görə, F. Hacıyev Türkiyə Respublikasında yaşadığından onun hesabı, ünvanı barədə ilkin olaraq məlumat əldə etmək mümkün olmadığından prosedurun icrası gecikmişdi. Ç.Əsgərov bildirib ki, F.Hacıyev Ali Məhkəməyə ünvanladığı müraciətdə ünvanı və hesabı barədə məlumat verib. Bu məlumat əldə olunandan sonra F.Hacıyevə Azərbaycan dövləti tərəfindən kompensassiyanın ödənilməsi üçün prosedurlara başlanılıb və qərarda qeyd olunan vaxtda - mayın ortalarınadək həmin məbləğ onun hesabına köçürüləcək.
Qeyd edək ki, Avropa Məhkəməsinin qərarı bu ilin fevral ayında qüvvəyə minib və 3 ay müddətində icra olunmalıdır. Kompensassiya vaxtında ödənilməzsə, Azərbaycan dövləti gecikən hər ay üçün faiz ödəməlidir.
Xatırladaq ki, F. Hacıyev şikayətində İnsan Haqları və Əsas Azadlıqlarının Müdafiəsi Haqqında Avropa Konvensiyasının 6-cı (ədalətli məhkəmə hüququ), 7-ci (qanunsuz cəzalandırılmamaq) və 14-cü (ayrı-seçkiliyin qadağan olunması) maddələrində nəzərdə tutulan hüquqlarının pozulduğunu göstərmişdi. Avropa Məhkəməsinin qərarı ilə Azərbaycan hökuməti F. Hacıyevə 3 min avro məbləğində təzminat və məhkəmə xərcləri üçün 2500 avro ödəməlidir.
.
