Azərbaycan,Bakı/ Trend , müxbir K. Zərbalıyeva/ Ötən ay diffamasiyaya dair 30-dan artıq məhkəmə iclası keçirilib. Media Hüquq İnstitutunun bazar ertəsi yaydığı hesabatda qeyd olunur ki, iyulda diffamasiya adı altında daha 9 iddia qaldırılıb, qəzetlərdən iri məbləğdə cərimə istənilib, beş jurnalistin həbsi tələb olunub. Həmin iddialardan ikisinə - "Səs" və "Alternativ" qəzetlərinə qarşı xüsusi ittiham qaydasında qaldırılan şikayət barışıqla başa çatıb. "Müxalifət", "Kriminal aləm" və "Mühakimə" qəzetlərinin hər birinin 50 min, jurnalistlər İlqar Vəliyevdən 30 min, Rövşən Kəbirlidən 20 min manat ödənc istəyən İctimai Televiziyanın bölgə əməkdaşı Əminə Rəhimovanın iddiası icraata götürülüb.
Dövlət Yol Polisi İdarəsinin məsul əməkdaşının iddiası əsasında "Azadlıq" qəzetinə, Ucar Rayon İstehlak Cəmiyyəti sədrinin iddiası əsasında "Bakı Xəbər" qəzetinə kəsilmiş cərimələri yuxarı məhkəmə instansiyaları dəyişməkdən imtina edib.
Hesabatda vurğulanır ki, "Müxalifət" qəzetinin baş redaktoru Rövşən Kəbirli və şöbə redaktoru Yaşar Ağazadəni 2 il 6 ay müddətinə həbsə məhkum edən hökmdən verilən apellyasiya şikayəti üzrə qətnamə çıxarılması ay boyunca təxirə salınıb.
"Gündəlik Azərbaycan" və "Realnı Azerbaydjan" qəzetlərinin həbsdə olan baş redaktoru Eynulla Fətullayevə qarşı daha ağır rəsmi ittihamlar irəli sürülüb, onun təsis etdiyi qəzetlərin keçmiş əməkdaşları Milli Təhlükəsizlik Nazirliyində dindirilib.
İyul ayında Azərbaycanın məhkəmə hakimiyyətinin qabaqcıl təcrübələri tətbiq etməsi baxımından diqqətəlayiq qərar qəbul etdiyi də vurğulanır. Belə ki, söz azadlığının qorunması sahəsində Avropa Məhkəməsi standartlarının Azərbaycanda tətbiqi yolunda ilk addımlardan biri atılıb. Yasamal Rayon Məhkəməsinin hakimi Şahin Abdullayev qarayaxma ilə bağlı xüsusi ittiham qaydasında "Azadlıq" qəzetinin baş redaktoru Qənimət Zahidin həbsini tələb edən məmurun şikayətinə baxarkən Avropa Məhkəməsinin "Torgersen İslandiyaya qarşı" işi üzrə qərarına istinad etməklə "ifadə azadlığı təkcə neytral, zərərsiz, yaxud xeyirxahlıqla qəbul olunmuş məlumat və fikirləri deyil, həmçinin təhqir edən, şoka salan və narahatlıq yaradan məlumatları əhatə edir" deyərək şikayəti rədd edib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
