Azərbaycan, Bakı/ Trend , müxbir Ü.İsmayılova/ Bu həftə Azərbaycan parlamentinə və Nazirlər Kabinetinə, Mülki Məcəllənin ölkənin lizinq bazarını tənzimləyən bəndlərinə dəyişiklik edilməsi üzrə təkliflər paketi təqdim olunacaq. Bunu çərşənbə axşamı Azərbaycan Lizinq Şirkətləri Assosiasiyasının (ALŞA) idarə heyətinin sədri Azər Məmmədov bildirib.
Azərbaycanda lizinq sahəsində qüvvədə olan qanunvericilik yoxdur, bu sahə Mülki Məcəllə ilə tənzimlənir.
"Azərbaycanın lizinq bazarının əsas problemi ikiqat vergitutma və sürətləndirilmiş amortizasiya mexanizmidir",-deyə Məmmədov bildirib.
İdarə heyətinin sədri daha öncə bildirmişdi ki ALŞA "Lizinq haqqında" qanunun hazırlanmasından imtina edib. Bu onunla əlaqədardır ki, yeni qanunun hazırlanması və qəbulu həddindən çox vaxt aparır.
Məmmədovun sözlərinə görə, ALŞA təkliflərini Azərbaycan Milli Sahibkarlar Konfederasiyası ilə birgə hazırlayır.
Lizinq Şirkətləri Assosiasiyası 27 oktyabr 2004-cü ildə Ataleasing, Unileasing, Muganleasing şirkətləri tərəfindən təsis olunub. Lizinq şirkətləri Assosiasiyasına, fəaliyyətdə olan bütün lizinq şirkətləri daxildir.
Azərbaycan Milli Sahibkarlar Konfederasiyası 1999-cu ildə yaradılıb. Qurumun üzvlərinin sayı 3.5 min nəfəri ötür.