Azərbaycan, Bakı, 19 yanvar / Trend , müxbir N.İsmayılova/
Böyük Britaniya Azərbaycan iqtisadiyyatına yatırılan sərmayələrin həcminə görə lider mövqeyini qorumaqda davam edir və 2008-ci il ərzində onun yatırımlarının xüsusi çəkisi xarici sərmayələrin ümumi həcminin 45,9 faizini təşkil edib. Bu barədə bazar ertəsi Dövlət Statistika Komitəsindən məlumat veriblər. Buna baxmayaraq,2007-ci illə müqayisədə, Britaniyanın sərmayələri 16,3 faiz azalıb və 1020,6 mln. manat olub.
2008 -ci il ərzində xarici ölkələr və beynəlxalq təşkilatlar tərəfindən Azərbaycan iqtisadiyyatına yatırılmış sərmayələrin 92,7 faizi (2061,9 mln. manat) Böyük Britaniya, ABŞ, Yaponiya, Norveç, Türkiyə, Cənubi Koreya, Çexiya və Almaniyadan olan sərmayədarların payına düşür.
Amerika sərmayələri 29,5 faiz azalaraq 433,4 mln. manat (xüsusi çəkisi 19,5 faiz), yapon - 31,4 faiz azalaraq 221,7 mln. manat (10 faiz), Norveç - 31,5 faiz azalaraq 138,8 mln. manat (6,2 faiz), türk - 7,5 faiz azalaraq 147,3 mln. manat (6,6 faiz) olub. Koreyanın sərmayələri - 38,5 mln. manat (1,7 faiz), Çexiya - 41,8 faiz artımla 31,4 mln. manat (1,4 faiz), Almaniya - 3 dəfə artaraq 30,01 mln. manat (1,4 faiz), Fransa - 2,1 dəfə artaraq 25,6 mln. manat (1,2 faiz), Rusiya - 6,8 dəfə artmaqla - 9,91 mln. manat (0,5 faiz) İran - 56,6 faiz azalmaqla, 15,5 mln. manat (0,7 faiz) təşkil edib.
Beynəlxalq maliyyə institutlarından ən böyük - 47,2 mln. manat həcmində sərmayə 47,6 faiz artımla və xüsusi çəkisi 2,1 faiz olmaqla, Dünya Bankı tərəfindən yatırılıb. Asiya İnkişaf Bankı 2008-ci ildə Azərbaycanda reallaşdırılan layihələrə, azalma 21,1 faiz olmaqla, 14,5 mln. manat (xüsusi çəkisi 0,7 faiz), İslam İnkişaf Bankı - azalma 10,3 faiz olmaqla 11,6 mln. manat (0,5 faiz), AYİB - azalma 43,5 faiz olmaqla 18,9 mln. manat (0,9 faiz), Küveyt İqtisadi İnkişaf Fondu - artım 45,8 faiz olmaqla 4,45 mln. manat (0,2 faiz) vəsait yatırıb. Uşaqların Müdafiəsi üzrə Beynəlxalq Təşkilat 15 min manat sərmayə qoyub.
Yanvarın 19 - na olan cari mübadilə məzənnəsi -- 0,8036 AZN/USD.
Müəlliflə əlaqə saxlamaq üçün elektron ünvan: [email protected]
