Azərbaycan, Bakı, 07 mart / Trend , müxbir N.İsmayılova /
"Avropa Yenidənqurma və İnkişaf Bankı (AYİB) 2009-cu ilin ortalarından 2011-ci ilin birinci yarısına qədər Azərbaycanın Garadagh Cement zavodunun təkmilləşdirilməsi və genişləndirilməsi layihəsinin maliyyələşdirilməsini planlaşdırır", - Bankın məlumatında deyilir.
"Maliyyələşdirmə zavodda yeni soba istismara veriləcəyi zaman, tikinti aparılan dövrdə həyata keçiriləcək", - məlumatda deyilir.
Bank rəhbərliyi aprelin 7-də baş tutacaq iclasda maliyyələşmənin müddəti məsələsini nəzərdən keçirəcək.
Sementin quru metodla istehsalına imkan verən yeni N6 sobanın tikintisi enerji qənaətinə və dörd hazırkı sobanı əvəzləməyə imkan verəcək, həmçinin atmosferə atılan tullantıların azaldılmasına nail olmaq mümkün olacaq.
"Layihə Azərbaycanın qeyri-neft sektoruna yatırılan ən böyük birbaşa xarici sərmayədir və özəl sektorda olan digər sərmayədarlara nümunə effekti yarada bilər", - AYİB-in məlumatında deyilir.
Garadagh Cement sement klinkeri istehsalını sutkada 2616 tondan 4000 tona, illik istehsalı isə klinker idxalı olmadan 1,1 milyon tondan 1,7 milyon tona çatdırmağı planlaşdırır.
AYİB ümumi dəyəri 330 milyon avro olan layihənin bir hissəsinin (170 milyon avro) maliyyələşdirilməsini təmin etmək niyyətindədir. Əsas kredit (A/B krediti) 150 milyon avro təşkil edəcək. Onlardan təxminən 50 faizi kommersiya banklarına təklif olunacaq (B klass kreditorlar). Daha 20 milyon avro AYİB-in C klass subordinə edilmiş krediti olacaq. Əlavə 30 milyon avro kredit isə şirkətin əsas səhmdarı Holcim-ə bütün banklar tərəfindən subordinə edilmiş istiqraz kimi veriləcək.
Garadagh Cement Azərbaycanın ən böyük və yeganə sement klinkeri istehsalçısıdır. Dünyanın aparıcı beton və sement tədarükçüsü olan Holcim İsveçrə şirkəti, Garadagh Cement-in 69,4 faiz səhm paketini 1999-cu ildəki özəlləşdirmə zamanı alıb.
2008-ci ildə AYİB Azərbaycanda 19 layihəyə 114 milyon dollar sərmayə yatırıb.
Ümumilikdə, AYİB Azərbaycanda 90 layihəyə 1,2 milyard dollar sərmayə yönəldib.
Martın 7-nə olan rəsmi məzənnə 0,805 AZN/USD təşkil edir.
Məqalə müəllifi ilə əlaqə ünvanı: [email protected]