Azərbaycan, Bakı, 04 avqust / Trend , müxbir N.İsmayılova /
Beynəlxalq Maliyyə Korporasiyası (IFC) Azərbaycanda korporativ idarəetmənin müasir standartlarının tətbiqinə texniki dəstək proqramı (ACGP) çərçivəsində Qiymətli Kağızlar üzrə Dövlət Komitəsinə ölkənin Mülki Məcəlləsinə dəyişikliklər layihəsini təqdim edib. Bu barədə çərşənbə axşamı IFC layihəsinin rəhbəri Karolina Brayt deyib.
"Bu dəyişikliklər korporativ sektora istiqamətləndirilib və maliyyə böhranından uğurlu çıxışa kömək edəcək. Qanunvericiliyin təkmilləşdirilməsi Azərbaycana daha çox investisiyanın cəlb edilməsinə imkan yaradacaq", - Brayt deyib.
Onun sözlərinə görə, həm dövlət qulluqçuları, həm də özəl şəxslərin daxil olduğu QKDK yanında məsləhət şurası bu təklifi nəzərdən keçirir. Bundan əlavə, gələcəkdə bu dəyişikliklərin komissiyadan kənar şəxslərin müzakirəsinə verilməsi də nəzərdə tutulur.
"Yaxın bir neçə ay ərzində bu prosesin başa çatacağı gözlənilir. İlin sonuna kimi layihə parlamentə təqdim oluna bilər", - o deyib.
Şura Mülki Məcəlləyə maraqlanan tərəflə, saziş üzrə dəyişikliklər də daxil olmaqla, cəmi dörd qanun layihəsi işləyib. Layihələr Azərbaycan hökuməti tərəfindən qəbul olunub.
Məqalə müəllifi ilə əlaqə ünvanı: [email protected]
