Azərbaycan, Bakı,12 aprel /Trend, müxbir N.İsmayılova/
Azərbaycan Mərkəzi Bankı (AMB) "Bank olmayan kredit təşkilatları haqqında" qanuna normativ aktları hazırlayır. Bunu bazar ertəsi AMB-nin kredit təşkilatlarının fəaliyyətinə nəzarət departamentinin rəhbəri Rəşid Orucov deyib.
"Artıq Mərkəzi Bank onları qeydiyyat üçün Ədliyyə Nazirliyinə təqdim edib. Bank olmayan kredit təşkilatlarının lisenziyalaşdırma qaydaları qüvvəyə minən kimi, maraqlanan təşkilatlar onların banka çevrilməsi məqsədilə AMB-yə müraciət edə bilər", - Orucov deyib.
Onun sözlərinə görə, qaydalara əsasən, nizamnamə kapitalına minimal tələb kreditin verilməsi zamanı girov əmanəti qəbul etmək hüququ olan BOKT üçün 300 min manat səviyyəsində, bu hüquqa malik olmayan kredit təşkilatları üçün 30 min manat səviyyəsində müəyyən olunub.
Qanunun ilkin variantında (ölkə Parlamentində müzakirələr zamanı) kreditin verilməsi zamanı girov əmanəti qəbul etmək hüququ olan BOKT üçün nizamnamə kapitalı 75 min manat, bu hüquqa malik olmayan kredit təşkilatları üçün 20 min manat səviyyəsində müəyyən olunub. Lakin birinci oxunuşdan sonra bu limitlər sənəddən çıxarılıb; həmin məsələlərin tənzimlənməsi hüququ Mərkəzi Banka məxsusdur. "BOKT haqqında" qanun ötən ilin dekabrında Milli Məclis tərəfindən qəbul olunub və qüvvəyə minib.
Hazırda kredit təşkilatları üçün nizamnamə kapitalı dörd min manat səviyyəsində müəyyən edilib.
Hazırda ölkədə 18 BOKT fəaliyyət göstərir. Bunun 14-ü beynəlxalq humanitar təşkilatlar tərəfindən yaradılıb. Bu gün ölkədə investorlar tərəfindən kredit təşkilatlarının yaradılmasına böyük maraq var, lakin bundan ötrü qanunun qəbulunu gözləyiblər. Bu, BOKT-nin fəaliyyəti üçün hüquqi baza yaradıb.
Hazırda Azərbaycanda mikromaliyyə fəaliyyəti ilə 31 təşkilat, o cümlədən, "Aqrar-kredit" dövlət BOKT və mikromaliyyələşdirmə ilə məşğul olan banklar məşğuldur. 2009-cu ildə BOKT-lərin ümumi aktivləri 30,9 faiz artaraq 183,8 milyon manat təşkil edib.
BOKT-lərin kredit qoyuluşlarının ümumi həcmi 28,5 faiz artaraq, 153,4 milyon manat təşkil edir.
Hazırda mikromaliyyə təşkilatları respublikanın 61 rayonunda fəaliyyət göstərir və 160 mindən çox fəal müştəriyə xidmət edir.
Aprelin 12-nə rəsmi məzənnə 0,8035 AZN/USD təşkil edir.