Azərbaycan, Bakı, 28 aprel /Trend, müxbir N.İsmayılova/
Çərşənbə günü Asiya İnkişaf Bankı (AİB) özünün ticari maliyyələşdirilməyə yardım proqramının genişləndirilməsi çərçivəsində Azərbaycanın beş bankı ilə ticari saziş imzalayıb. Sazişin imzalanması üçün AİB-in özəl sektor üzrə departamentində investisiyalarla bağlı aparıcı mütəxəssis Stiven Bek Bakıya birgünlük səfərə gəlib.
Sazişlər AccessBank, AGBank, Bank of Baku, DəmirBank və Bank Respublika ilə imzalanıb.
"Bu, ticarətin və Azərbaycan sahibkarlığının inkişafı üçün mühüm alətdir", - AccessBank-ın baş meneceri Endrü Pospilovski deyib. Onun sözlərinə görə, Asiya Bankı AccessBank-a ticari maliyyələşdirilməsi üçün zəmanət verib və bu zəmanətin həcmi artırıla bilər.
AİB ilə imzalanmış saziş çərçivəsində Bank of Baku üçün revolver kreditin həcmi bir milyon manat artırılaraq, beş milyon dollara çatdırılıb, ticari maliyyələşdirilmə üçün isə limit əvvəlki səviyyədə - iki milyon dollar səviyyəsində saxlanılıb.
AGBank üçün revolver krediti iki dəfə - bir milyon dollar kimi artırılıb, dörd il öncə imzalanmış ticari maliyyələşdirilməsi müqaviləsi yenilənib, zəmanət limiti əvvəlkitək üç milyon dollar həcmində saxlanılıb.
TFFP proqramına DəmirBank da qoşulub. Bank üçün ümumi məbləği dörd milyon dollar həcmində kredit xətti açılıb. Bunun 3,5 milyon dolları ticari maliyyələşdirmə üçün, 0,5 milyon dollar isə bərpa olunan kredit qismində nəzərdə tutulub.
Bank Respublika ilə imzalanan müqavilə bir milyon dollar həcmində revolver kreditinin verilməsini nəzərdə tutur.
2006-cı ildən 2008-ci ilədək TFFP çərçivəsində Azərbaycanın dörd bankı ilə - AccessBank, AGBank, Bank of Baku və Bank Respublika ilə sazişlər imzalanıb və onlar üçün 10 milyon dollar həcmində maliyyələşdirmə açılıb.
Mərkəzi Asiya üçün TFFP-nin genişləndirilməsi imkanlarının müzakirəsi məqsədilə 2009-cu ilin oktyabrında AİB-in özəl sektor üzrə vəzifəli şəxsləri Azərbaycan, Monqolustan və Özbəkistana səfər ediblər.
AİB-in bir milyard dollar məbləğində proqramı inkişaf etməkdə olan ölkələrdə ticarətin dəstəklənməsi məqsədilə üzv ölkələrin beynəlxalq və inkişaf etməkdə olan banklarının maliyyələşdirilməsini təmin edir. 2009-cu ildə ticarət əməliyyatlarının maliyyələşdirilməsinin həcmi 250 faiz artaraq, 1,9 milyard dollar təşkil edib. İnkişaf etməkdə olan ölkələrdə şirkətlərin ixracın inkişafına lazım olan kredit resurslarına çıxışı uzun müddət çətin olduğundan, bu, sənayenin yeni sektorlarının inkişafına, ümumilikdə iqtisadi artıma mane olub.
Asiya Bankı ticarətin maliyyələşdirilməsi proqramında Azərbaycan bankları arasında iştirakçıların genişləndirilməsi planları barədə məlumat verib.
AİB TFFP-in həyata keçirilməsinə 2004-cü ildə başlayıb, lakin onu indiki həcmə qədər ötən il martın 31-də genişləndirib. TFFP-nin portfelinin uzadılmasının və onun icra müddətinin təxirə salınmasının mümkünlüyü ilə əlaqədar proqram 2013-cü ilin sonunadək ticari maliyyələşdirmənin dəstəklənməsi üzrə 15 milyard dollara qədər vəsaiti təmin edə bilər.
Asiya Bankının gözləntilərinə görə, proqramda iştirak edən Asiya və beynəlxalq bankların sayı 2010-cu ildə də artmaqda davam edəcək.
