Azərbaycan, Bakı, 12 may /Trend, müxbir Ü.İsmayılova/
Apreldə Bakının daşınmaz əmlak bazarında qiymətlər orta hesabla 1,2 faiz aşağı düşüb, ötən ilin analoji dövründəkindən 11,3 faiz ucuzlaşıb. Bu barədə çərşənbə günü MBA Group konsaltinq şirkətinin baş direktoru Nüsrət İbrahimov deyib.
Ötən ay Bakıda ilkin yaşayış mənzil bazarında qiymətlər 0,7 faiz artıb, 2009-cu ilin analoji dövrü ilə müqayisədə 13,7 faiz ucuzlaşıb. İbrahimov bildirib ki, Bakıda ilkin bazarda qiymətlər 1 kvadratmetr üçün 814 dollardan 820 dollara qalxıb.
Təkrar mənzil bazarında qiymətlər 1,35 faiz artıb və 2009-cu ilin analoji dövrü ilə müqayisədə 12,1 faiz ucuzlaşıb. Ay ərzində qiymətlər 1 kvadratmetr üçün 1330 dollardan 1348 dollaradək artıb.
Ötən ay Bakıda kommersiya obyektləri bazarı da 2,2 faiz bahalaşıb, il ərzində isə 3,18 faiz ucuzlaşıb. Qeyri-yaşayış obyektinin 1 kvadratmetrinin qiyməti 3248 dollardan 33200 dollaradək artıb.
İbrahimov deyib ki, bazarın digər seqmentləri üzrə qiymətlər düşüb.
Onun sözlərinə görə, ötən ay Bakının torpaq bazarında qiymətlər 6,6 faiz aşağı enib. İl ərzində torpağın 1 sotu 17,97 faiz ucuzlaşaraq, 16 711 dollardan 15 604 dollara düşüb.
Özəl evlərin qiyməti 0,3 faiz ucuzlaşıb; il ərzində 12,6 azalaraq - 1 kvadratmetri 237 dollardan 236 dollara düşüb.
Apreldə mənzillərin icarəyə verilmə qiyməti 0,7 faiz, il ərzində ötən ilin analoji dövrü ilə müqayisədə 6,9 faiz aşağı düşüb; 1 kvadratmetrə görə 695 dollardan 690 dollara enib. Ticarət obyektlərinin icarə qiyməti martdakı 19,2 dollardan 18,3 dollaradək düşüb. Beləliklə, ötən ay bazarın bu seqmenti üzrə qiymətlər 4,8, il ərzində 18,3 faiz azalıb.
Azərbaycanın daşınmaz əmlak bazarının ümumi vəziyyətinə dair proqnozlardan danışan ekspert deyib ki, qiymətin və aktivliyin aşağıdüşmə tendensiyası yalnız bazara çatan dünya malijyyə böhranı üzündən davam edir. Ola bilsin, bu dinamika 2013-cü ilədək saxlanılsın, sonra isə nisbi artım gözlənilir.
