Azərbaycan, Bakı, 29 noyabr /Trend, müxbir N.İsmayılova/
Yaxın vaxtlarda Azərbaycan Mərkəzi Bankı (AMB) ölkədə yaşayış-tikinti banklarının yaradılması ilə bağlı mövqeyini müəyyən edəcək. Bu barədə bazar ertəsi AMB-nin hüquq departamentinin rəhbəri Rəna Məlikova bildirib.
"AMB bir müddət əvvəl "Yaşayış-tikinti bankları haqqında" qanun layihəsi hazırlayaraq Prezident Administrasiyasına təqdim edib. Lakin dünya bazarındakı maliyyə böhranı bu layihəni reallaşdırmağa imkan vermədi. Ona görə ki, bu sistemlər istənilən şəraitdə deyil, yalnız iqtisadi baxımdan etibarlı şəraitdə işləyir", - Məlikova deyib.
Onun sözlərinə görə, buna görə də layihə təxirə salındı. İndi bütün dünyada böhrandan sonra gərginliyin azalması tendensiyası müşahidə olunur və bu gün AMB mənzilə olan tələbin kreditləşməsi üzrə bu alternativ metodun aktuallaşdırılması istiqamətində çalışır.
"Biz Almaniyadan olan ekspertlərlə işləyirik. KfW alman inkişaf bankının xətti ilə bizə ekspert yardımı təqdim olunub və biz ilin sonunadək "bu layihəni yaxın vaxtlarda irəli sürməyə və bu sistemi yaratmağa dəyərmi və ya onu təxirə salmaq" barədə öz mövqeyimizi müəyyən etmək fikrindəyik", - o deyib.
Yaşayış-tikinti bankları ipoteka və mənzil kreditləşməsinin sosial istiqamətini təmin edir. Kreditlərin verilməsinin sürətləndirilməsi üçün qeydiyyat "bir pəncərə" sistemi ilə qeydiyyat tərəfləri arasında qarşılıqlı münasibətlərin qurulması vasitəsilə aparılacaq.
Qanun layihəsi yaşayış-tikinti banklarının ayrıca maliyyə institutları kimi yaradılmasını nəzərdə tutur. AMB-nin bank sektoruna, eləcə də bu yeni maliyyə institutlarına qarşı irəli sürdüyü prudensial tələblər yaşayış-tikinti banklarının kapitallaşdırılması tələbləri kimi ayrıca müzakirə olunacaq.
Yaşayış-tikinti banklarının mahiyyəti ondan ibarət olacaq ki, vətəndaş banka pul qoymaqla ipoteka krediti ala bilsin. Bununla yanaşı, kreditin həcmi əmanətin məbləğini xeyli üstələyəcək.
Hazırda Azərbaycan Mərkəzi Bankı yanında İpoteka Fondu 21 müvəkkil bank vasitəsilə ölkədə dövlət büdcəsinin vəsaitləri hesabına sosial ipoteka, ipoteka istiqrazlarının yerləşdirilməsi hesabına isə kommersiya ipotekalarının maliyyələşdirilməsini həyata keçirir.