Azərbaycan, Bakı, 14 fevral /Trend, müxbir N.İsmayılova/
2011-ci ilin yanvarında Azərbaycanda sənaye istehsalı (məhsul istehsalı və sənaye xarakterli xidmətlərin göstərilməsi) 2,5 milyard manat təşkil edib ki, bu da 2010-cu ilin müvafiq dövr göstəricisindən 3,3 faiz azdır. Bu barədə bazar ertəsi Trend-ə Dövlət Statistika Komitəsindən bildiriblər.
İl ərzində özəl sektorun payı 1,7 faiz azalaraq sənaye istehsalının ümumi həcminin 80,6 faizini təşkil edib. Bu zaman 92,3 faiz sənaye mallarının, 7,7 faiz isə sənaye xarakterli xidmətlərin payına düşüb. Qeyri-neft sektorunda məhsul istehsalı 9,4 faiz artıb.
Hesabat dövründə hasilat sənayesində istehsalın həcmi 3,7 faiz azalaraq 1,8 milyard manat təşkil edib. Azərbaycan Beynəlxalq Əməliyyat Şirkərinin (ABƏŞ) tərkibinə daxil olan müəssisələrin hasil etdiyi neftin həcmi 4,1 milyard ton, təbii qaz hasilatı isə 2 milyard kubmetr təşkil edib.
Emal sənayesinin həcmi 476 milyon manat təşkil edərək 3 faiz artıb. Yanvar ayı ərzində avtomobil, qoşqu və yarımqoşquların (47,4 dəfə), elektrik avadanlıqların (5 dəfə), metallurgiya sənayesi (14,3 faiz) və kimya sənayesi (35,1 faiz) istehsalında xeyli artım müşahidə olunub.
Qida məhsullarının istehsalında da artım müşahidə edilib. Bu zaman ölkədə balıq məhsullarının istehsalı 2,3 dəfə artaraq 46,8 ton, ət 2,2 faiz (21 min ton), süd 5,4 faiz (59,1 min ton), kərə yağı 0,8 faiz (1,8 min ton), pendir və kəsmik 2,2 faiz artaraq 3,7 min ton, bitki yağları 41,7 faiz (8,7 min ton) təşkil edib.
Fevralın 14-nə olan rəsmi məzənnə 0,7954 AZN/USD təşkil edir.
