Azərbaycan, Bakı, 3 mart /Trend/
Xəzər dənizi İranın inkişafı üçün böyük və əhəmiyyətli potensiala malik bir dənizdir. Tarix boyu bu dənizin potensialından yaxşı istifadə edə bilməmişik, lakin indi Gilan əyalətində bu dənizin potensialından istifadə üçün infrastruktur mövcuddur. Bu sözləri İranın Gilan əyalətinin başçısı Ruhullah Qəhrəmani deyib. Bu barədə Trend İranın İRNA agentliyinə istinadən məlumat verir.
O əlavə edib ki, hazırda Gilan əyalətində dənizin potensialından istifadə etmək üçün dəmiryol, magistral yol və hava limanı kimi infrastrukturlar mövcuddur.
Qəhrəmani Xəzər dənizi sahilində yaxın gələcəkdə daha üç limanın tikiləcəyini deyib. "Xəzər sahilindəki Ləngərud şəhərində Çəmxalə, Kiyaşəhr və Çabuksər limanlarını da tikmək niyyətindəyik və bunun üçün proqram hazırlanır", - Qəhrəmani deyib.
O əlavə edib ki, Çabuksər limanı istirahət və turizm limanı kimi fəaliyyət göstərəcək.
Qəhrəmani Ənzəli limanının da yükləmə və boşaltma potensialının artırılacağını deyib. "Yaxın 18 ay ərzində Ənzəli limanının yükləmə və boşaltma potensialı 11 milyon tona çatdırılacaq. Bununla da Ənzəli limanı regionun ən böyük limanlarından birinə çevriləcək", - Qəhrəmani deyib.
Hazırda İranın Xəzər dənizi sahillərində 5 (Ənzəli, Nouşəhr, Əmirabad, Gəz və Neka) limanları fəaliyyət göstərir. Astara limanı isə inkişaf etdirilir.
